મહારાષ્ટ્ર એફડીએ કમિશનર તુકારામ મુંઢેએ 'વિમલ ઈલાયચી'ની જાહેરાત મામલે શાહરૂખ ખાન, અજય દેવગન અને ટાઈગર શ્રોફને કારણદર્શક નોટિસ ફટકારી હતી. અગાઉ અટકળો હતી કે એક અભિનેતાએ જવાબ નથી આપ્યો, પરંતુ એફડીએએ સ્પષ્ટ કર્યું છે કે ત્રણેયના જવાબ મળી ગયા છે. આરોપ છે કે આ સ્ટાર્સ ઈલાયચીની આડમાં પ્રતિબંધિત પાન મસાલાનું પ્રમોશન કરી રહ્યા છે. આ માટે 11 ઓગસ્ટના રોજ નોટિસ આપીને 15 દિવસની અંદર જવાબ માંગવામાં આવ્યો હતો.

મંગળવારે યોજાયેલી પ્રેસ કોન્ફરન્સમાં તુકારામ મુંઢેએ જણાવ્યું હતું કે બે અભિનેતાઓએ વ્યક્તિગત સુનાવણીની માંગ કરી હતી, જેને પગલે સોમવારે બંનેની રૂબરૂ સુનાવણી કરવામાં આવી હતી. જોકે, આ બે અભિનેતાઓ કોણ હતા તેના નામ જાહેર કરવામાં આવ્યા નથી. બંનેની સુનાવણી પૂર્ણ થયા બાદ હવે એફડીએ આ કેસમાં આગળની કાયદાકીય પ્રક્રિયા પર કામ કરી રહ્યું છે.

આ મામલે એનડીટીવી સાથેની વાતચીતમાં તુકારામ મુંઢેએ કડક વલણ અપનાવતા કહ્યું હતું કે ભલે લોકો માટે તેઓ મોટા સ્ટાર્સ હોય, પણ મારા માટે તેઓ માત્ર કાયદો તોડનાર જાહેરાતકર્તા છે અને કાયદો પોતાનું કામ કરશે. તેમણે સ્પષ્ટ કર્યું હતું કે માત્ર કંપની જ નહીં, ફૂડ સેફ્ટી કાયદા હેઠળ પ્રોડક્ટનું પ્રમોશન કરનાર કલાકારો પણ સમાન રીતે જવાબદાર છે. જાહેરાત કરતા પહેલાં પ્રોડક્ટ કાયદેસર છે કે નહીં અને તેના દાવા સાચા છે કે નહીં તે ચકાસવું કલાકારોની ફરજ છે.

આ સમગ્ર કાર્યવાહી ફૂડ સેફ્ટી એન્ડ સ્ટાન્ડર્ડ એક્ટ, 2006 હેઠળ કરવામાં આવી છે. આ કાયદાની કલમ 24 કોઈપણ પ્રોડક્ટ અંગે ભ્રામક જાહેરાત કરવા કે ખોટા દાવા કરવા પર સંપૂર્ણ પ્રતિબંધ મૂકે છે. જ્યારે કલમ 53 હેઠળ ગેરમાર્ગે દોરતી કે પ્રતિબંધિત વસ્તુઓની જાહેરાતમાં સામેલ થવા અથવા તેને પ્રકાશિત કરવા બદલ 10 લાખ રૂપિયા સુધીનો દંડ ફટકારવાની કડક જોગવાઈ છે.