મહારાષ્ટ્રના થાણે શહેરમાં શિવસેનાના અગ્રણી નેતાની જાહેરમાં ગોળી મારીને હત્યા કરાતા ચકચાર મચી છે. શિવસેનાના માનપાડા વિભાગના પ્રમુખ પ્રદીપ પુર્ણેકર પોતાના કાર્યાલય પાસે હતા ત્યારે જ આ જીવલેણ હુમલો થયો હતો. અંધાધૂંધ ગોળીબારમાં ગંભીર રીતે ઘવાયેલા નેતાનું હોસ્પિટલમાં સારવાર દરમિયાન મોત નીપજ્યું હતું.

આ સનસનીખેજ ઘટના મનોરમાનગર વિસ્તારમાં બની હતી. પ્રાથમિક માહિતી મુજબ, પ્રદીપ પુર્ણેકર ઓફિસ બહાર ઊભા હતા ત્યારે બાઇક પર આવેલા અજાણ્યા શૂટર્સે અચાનક ફાયરિંગ શરૂ કર્યું હતું. ઓળખ છુપાવવા હુમલાખોરોએ હેલ્મેટ અને માસ્ક પહેર્યા હતા. તેઓએ અનેક રાઉન્ડ ગોળીઓ ચલાવતા 2 ગોળીઓ પુર્ણેકરને વાગી હતી અને તેઓ લોહીલુહાણ થઈ જમીન પર ઢળી પડ્યા હતા.

સરેઆમ થયેલા આ ફાયરિંગને કારણે સમગ્ર વિસ્તારમાં ભારે દહેશતનો માહોલ છવાઈ ગયો હતો. ઘટના બાદ તરત જ આસપાસના લોકો ત્યાં એકઠા થઈ ગયા હતા. સ્થાનિકો ઈજાગ્રસ્ત નેતાને તાત્કાલિક નજીકની હોસ્પિટલમાં લઈ ગયા હતા, પરંતુ ટૂંકી સારવાર બાદ તબીબોએ તેમને મૃત જાહેર કર્યા હતા.

બનાવની જાણ થતાં જ ઠાણે પોલીસનો કાફલો તાબડતોબ ઘટનાસ્થળે પહોંચી ગયો હતો. આ હત્યા પાછળ રાજકીય અદાવત છે કે કોઈ અંગત દુશ્મનાવટ, તે દિશામાં પોલીસે તપાસ તેજ કરી છે. શૂટર્સ કયા હથિયાર સાથે આવ્યા હતા અને કેટલા હતા તે જાણવા સીસીટીવી ફૂટેજ ચકાસીને આરોપીઓને ઝડપી પાડવા ચારેકોર કડક નાકાબંધી કરી દેવાઈ છે.