અમેરિકાની સિલિકોન વેલીમાં ન્યૂયોર્ક પોસ્ટના એક રિપોર્ટે સનસનાટી મચાવી દીધી છે. ટેક્નોલોજી અને એઆઈ ઈન્ડસ્ટ્રીમાં કામ કરતી મહિલાઓમાં યૌન શોષણકર્તાઓની એક ગુપ્ત સ્પ્રેડશીટ ફરી રહી હોવાનો દાવો કરાયો છે. આ પ્રાઇવેટ ડોક્યુમેન્ટમાં ટેક જગતના 100થી વધુ મોટા રોકાણકારો, ઉદ્યોગપતિઓ અને નામાંકિત હસ્તીઓ પર યુવતીઓને ડ્રગ્સ આપીને બળાત્કાર તેમજ યૌન ઉત્પીડન કરવાના ગંભીર આરોપો લાગ્યા છે.

કારકિર્દી બરબાદ થવાના ડરથી પીડિત મહિલાઓ પોલીસમાં ફરિયાદ કરવાનું ટાળી રહી છે. આથી નવી આવતી યુવતીઓને આવા શંકાસ્પદ લોકોથી સુરક્ષિત રાખવા અને સાવચેત કરવા મહિલાઓ એક ગુપ્ત 'વિસ્પર નેટવર્ક' ચલાવી રહી છે. આ નેટવર્ક સાથે જોડાયેલી 20 વર્ષીય એક મહિલા કર્મચારીએ જણાવ્યું હતું કે, મોટી હાઈ-પ્રોફાઈલ પાર્ટીઓમાં જોવા મળતા અનેક જાણીતા દિગ્ગજોના નામ આ લિસ્ટમાં સામેલ છે.

એક પીડિતાએ પોતાનો ડર વ્યક્ત કરતા જણાવ્યું હતું કે, જો તે કાનૂની લડાઈ લડે અને તેમાં હારી જાય, તો શહેરના તમામ મોટા રોકાણકારો તેને બ્લેકલિસ્ટ કરી દેશે. રિપોર્ટ અનુસાર, યૌન શોષણની મોટાભાગની ઘટનાઓ 'હેકર હાઉસ'માં બની છે. આ એવી જગ્યાઓ છે જ્યાં યુવા સંસ્થાપકો, રોકાણકારો અને ટેક કર્મચારીઓ સાથે રહીને કામ કરે છે.

સિલિકોન વેલીના એક ઈનસાઈડરના જણાવ્યા મુજબ, આરોપીઓ સૌપ્રથમ મિત્રતા કેળવીને યુવતીઓનો વિશ્વાસ જીતે છે અને ત્યારબાદ તેમની સાથે દુષ્કર્મ આચરે છે. ખાસ કરીને અમેરિકા અથવા સિલિકોન વેલીમાં નોકરી કરવા આવતી નવી યુવતીઓ અને યુવા કર્મચારીઓને ખૂબ જ સરળતાથી નિશાન બનાવવામાં આવી રહ્યા છે.