દક્ષિણ ગુજરાત તરફથી ચોમાસું રાજ્યમાં ધીમે ધીમે આગળ વધી રહ્યું છે. હાલમાં ગુજરાત પર પશ્ચિમી વિક્ષેપ, ચક્રવાતી પરિભ્રમણ અને ટ્રફ એમ ત્રણ મજબૂત વરસાદી સિસ્ટમ એકસાથે સક્રિય થઈ છે. આ સાનુકૂળ વાતાવરણને પગલે છેલ્લા 24 કલાક દરમિયાન રાજ્યના 33 તાલુકાઓમાં મેઘમહેર જોવા મળી છે. જેમાં સુરત શહેરમાં સૌથી વધુ 2.60 ઇંચ વરસાદ નોંધાયો છે. આ સિસ્ટમની અસર હેઠળ આગામી 2 અને 3 જુલાઈએ સમગ્ર રાજ્યમાં સાર્વત્રિક વરસાદ પડવાની પ્રબળ સંભાવના છે.

ગાંધીનગર સ્થિત રાજ્ય કટોકટી સંચાલન કેન્દ્રના આંકડા અનુસાર, આજે સવારે 6 વાગ્યે પૂરા થતા 24 કલાકના સમયગાળામાં અલગ અલગ વિસ્તારોમાં નોંધપાત્ર વરસાદ પડ્યો છે. સુરત બાદ વાલોડમાં 2.05 ઇંચ સાથે સારો એવો વરસાદ વરસ્યો હતો. આ ઉપરાંત માંગરોળ અને કામરેજમાં એકસરખો 1.65 ઇંચ, પલસાણામાં 1.34 ઇંચ, અરેઠમાં 1.26 ઇંચ તેમજ ઉમરગામમાં 1.06 ઇંચ વરસાદ નોંધાયો છે.

હવામાન વિભાગની આગાહી મુજબ, 2 જુલાઈથી રાજ્યમાં ચોમાસું બરાબરની જમાવટ કરશે. અમદાવાદ હવામાન કેન્દ્રએ 2 થી 4 જુલાઈ દરમિયાન સમગ્ર ગુજરાતમાં વ્યાપક વરસાદની આગાહી વ્યક્ત કરી છે. હાલમાં દરિયામાં ભારે કરંટ જોવા મળી રહ્યો હોવાથી સુરક્ષાના ભાગરૂપે માછીમારોને દરિયો ન ખેડવાની કડક સલાહ આપવામાં આવી છે. નવી વરસાદી સિસ્ટમ સક્રિય થવાને કારણે પવનની ગતિમાં પણ નોંધપાત્ર વધારો થશે અને કલાકના 40 થી 60 કિલોમીટરની ઝડપે ભારે પવન ફૂંકાઈ શકે છે.