રેલ્વે પ્રમોશન પરીક્ષાના પેપર લીક કેસમાં CBIએ અત્યાર સુધીની સૌથી મોટી કાર્યવાહી કરી છે. તપાસ એજન્સીએ પંડિત દીનદયાળ રેલ્વે ડિવિઝન ઓફિસમાંથી 26 લોકોની અટકાયત કરી લીધી છે. આમાં વિભાગના 2 વરિષ્ઠ અધિકારીઓનો પણ સમાવેશ થાય છે. આ સાથે DRM ઓફિસમાંથી મહત્વપૂર્ણ દસ્તાવેજો પણ જપ્ત કરી લેવામાં આવ્યા છે.

CBIએ 3 અને 4 માર્ચની રાત્રે એક ઓપરેશન હાથ ધર્યું હતું. આ સમયગાળા દરમિયાન પૂર્વ મધ્ય રેલ્વે હેઠળના વિભાગીય પરીક્ષાના પેપર લીક કૌભાંડને મુગલ સરાઈ ખાતેથી શોધી કાઢવામાં આવ્યું અને તેનો પર્દાફાશ કરવામાં આવ્યો હતો. આ સમગ્ર કેસમાં 1 વરિષ્ઠ ડીઈઈ અને અન્ય 8 રેલ્વે અધિકારીઓ, ઉમેદવાર અને અજાણ્યા વ્યક્તિઓની સામે કેસ દાખલ કરવામાં આવ્યો છે.

પૂર્વ મધ્ય રેલ્વેએ 4 માર્ચ 2025ના રોજ ચીફ લોકો ઈન્સ્પેક્ટરની જગ્યાઓ માટે વિભાગીય પરીક્ષાનું આયોજન કર્યું હતું. જ્યારે CBIએ આ કેસમાં 3 જગ્યાએ તપાસ કરી, ત્યારે 17 ઉમેદવાર પાસેથી હસ્તલેખિત પ્રશ્નપત્રોની ફોટોકોપી પણ મળી આવી છે. અત્યાર સુધીની તપાસમાં જાણવા મળ્યું છે કે આરોપી સિનિયર ડીઈઈને પરીક્ષા માટે પ્રશ્નપત્ર તૈયાર કરવાની જવાબદારી સોંપવામાં આવી હતી.

તેમણે પોતાના હાથે અંગ્રેજીમાં પ્રશ્નો લખ્યા હતા અને 1 લોકો પાઈલટને આપ્યા હતા. તેમણે તેનો હિન્દીમાં અનુવાદ કર્યો અને 1 ઓએસને આપ્યો હતો. કથિત ઓપરેટરે તે માહિતી કેટલાક અન્ય રેલ્વે કર્મચારીઓ દ્વારા ઉમેદવારો સુધી પહોંચાડી છે. CBIએ આરોપી સિનિયર ડીઈઈ અને અન્ય રેલ્વે કર્મચારીઓની પૈસા એકત્ર કરવા અને કાગળો વહેંચવાના આરોપમાં ધરપકડ કરી છે.