અમેરિકા અને ઈરાન વચ્ચે વધી રહેલા નવા તણાવને કારણે વૈશ્વિક બજારમાં મોટી હલચલ જોવા મળી રહી છે. આ તણાવના લીધે મોંઘવારી વધવાની ચિંતા અને આ વર્ષે વ્યાજ દરોમાં વધારો થવાની આશંકાઓને પગલે ગુરુવાર, 9 જુલાઈના રોજ સોના અને ચાંદીના ભાવમાં કડાકો બોલાયો છે.

MCX બજાર ખુલતાની સાથે જ સવારે 9:15 વાગ્યે સોના-ચાંદીના ભાવમાં ઘટાડો જોવા મળ્યો હતો. જેમાં ઓગસ્ટ મહિનાના સોનાના વાયદાના ભાવ 0.30% ઘટીને 10 ગ્રામ દીઠ ₹1,43,275 પર આવી ગયા હતા. જ્યારે સપ્ટેમ્બર મહિનાના ચાંદીના વાયદાના ભાવ પણ 0.76% તૂટીને પ્રતિ કિલોગ્રામ ₹2,21,749 પર ટ્રેડ થઈ રહ્યા હતા.

MCXના આંકડા મુજબ, આ વર્ષે 29 જાન્યુઆરીએ સોનું ₹1,93,096ની રેકોર્ડ સપાટી પર હતું, જેની સરખામણીએ તે અત્યાર સુધીમાં અંદાજે ₹50,000 જેટલું સસ્તું થઈ ચૂક્યું છે. બીજી તરફ, ચાંદી પણ તેના ઓલ ટાઈમ હાઈ લેવલ ₹4,20,048થી અત્યાર સુધીમાં આશરે ₹2 લાખ જેટલી સસ્તી થઈ ગઈ છે.

અમેરિકા અને ઈરાન વચ્ચે ફરી શરૂ થયેલી દુશ્મનીના કારણે વૈશ્વિક બજારમાં સોનાના ભાવમાં મોટો ઘટાડો થયો છે. આંતરરાષ્ટ્રીય માર્કેટમાં સોનું સતત ત્રણ દિવસથી ઘટી રહ્યું છે અને તે ઘટીને અંદાજે 4,080 ડૉલર પ્રતિ ઔંસ પર આવી ગયું છે. સિંગાપોરના બજારમાં પણ સ્પોટ ગોલ્ડ 4,078.66 ડૉલરની સપાટી પર જોવા મળ્યું હતું, જ્યારે ચાંદી નજીવી વધીને 58.45 ડૉલર પ્રતિ ઔંસ પર પહોંચી હતી.

સામાન્ય રીતે જ્યારે મોંઘવારી વધે ત્યારે લોકો સુરક્ષિત રોકાણ તરીકે સોનું ખરીદે છે, પરંતુ જ્યારે વ્યાજ દરો વધવાની શક્યતા હોય ત્યારે સોનાના ભાવ ઘટે છે. આવું એટલા માટે થાય છે કારણ કે સોનામાં રોકાણ કરવાથી અન્ય સ્કીમની જેમ કોઈ વ્યાજ કે નિયમિત કમાણી થતી નથી.