રાજકોટઃ અમદાવાદ બાદ રાજકોટ કોર્ટને બોમ્બથી ઉડાવી દેવાની ધમકી મળતાં પોલીસ અને કોર્ટ પ્રશાસનમાં દોડધામ મચી ગઈ હતી. ખાલિસ્તાની ગ્રુપના નામે આવેલા ઈ-મેઈલમાં રાજકોટ કોર્ટ પરિસર ઉડાવી દેવા ઉપરાંત જામનગર સુધી ડ્રોન હુમલો કરવાની અને ગાંધીનગરના મહાત્મા મંદિરને નિશાન બનાવવાની ધમકી અપાઈ હતી.

રાજકોટ કોર્ટના સત્તાવાર ઈ-મેઈલ તથા રાજકોટ બાર એસોસિએશનના ઈ-મેઈલ પર આ સંદેશો મોકલાયો હતો. તેમાં વાડીનાર પોર્ટ, નયારા રિફાઇનરી અને સિક્કા પોર્ટ જેવા સંવેદનશીલ ઔદ્યોગિક સ્થળો પર હુમલાની ચીમકી પણ અપાઈ હતી. મહાત્મા મંદિર ખાતે આઇફોનની બેટરીની મદદથી બ્લાસ્ટ કરવાની ધમકી પણ આપવામાં આવી હતી.

ધમકીભર્યો ઈ-મેઈલ સામે આવ્યા બાદ કોર્ટ પરિસરમાં અધિકારીઓ અને વકીલો વચ્ચે અફરાતફરીનો માહોલ સર્જાયો હતો. તાત્કાલિક પોલીસને જાણ કરાતા ઉચ્ચ અધિકારીઓ કાફલા સાથે કોર્ટ ખાતે પહોંચ્યા હતા અને સુરક્ષા વ્યવસ્થા સઘન કરી હતી. રાજ્યના અન્ય સંવેદનશીલ સ્થળોએ પણ સુરક્ષા તંત્રને એલર્ટ કરવામાં આવ્યું હતું.

સાયબર ક્રાઇમ અને સુરક્ષા એજન્સીઓએ ઈ-મેઈલ ક્યાંથી, કયા આઇપી સરનામા પરથી અને કોના દ્વારા મોકલાયો તેની તપાસ શરૂ કરી છે. ધમકી પાછળ કોણ છે અને સંદેશો ખરેખર કયા જૂથ સાથે સંકળાયેલો છે તે સહિતના તમામ પાસાં તપાસવામાં આવી રહ્યા છે