ઈલોન મસ્ક અને જેફ્રી એપસ્ટિન વચ્ચેની ગુપ્ત વાતચીતના ખુલાસાએ સોશિયલ મીડિયા પર ખળભળાટ મચાવી દીધો છે. અત્યાર સુધી એપસ્ટિનથી અંતર રાખવાનો દાવો કરનારા મસ્ક પોતે તેના પ્રાઇવેટ આઇલેન્ડની પાર્ટીઓ વિશે પૂછપરછ કરતા હોવાનું ઇમેલ્સમાં સામે આવ્યું છે. અમેરિકન ન્યાય વિભાગ (DOJ) દ્વારા જાહેર કરવામાં આવેલી ફાઇલ્સ મુજબ, 13 ડિસેમ્બર 2013ના રોજ ઈલોન મસ્કે જેફ્રી એપસ્ટિનને ઇમેઇલ કર્યો હતો. મસ્કે લખ્યું હતું કે તેઓ રજાઓ દરમિયાન તે વિસ્તારમાં હશે અને એપસ્ટિનને મળવા માટે યોગ્ય સમય પૂછ્યો હતો. એપસ્ટિને વળતા જવાબમાં 1 થી 8 તારીખ વચ્ચે ગમે ત્યારે આવવાનું આમંત્રણ આપ્યું હતું અને 2 જાન્યુઆરીએ મળવાનું નક્કી થયું હતું, જોકે છેલ્લી ઘડીએ એપસ્ટિને કામનું બહાનું કાઢીને આ મીટિંગ રદ કરી હતી. નવેમ્બર 2012ની એક ચેટ વધુ ચોંકાવનારી છે. એપસ્ટિને જ્યારે પૂછ્યું કે આઇલેન્ડ પર કેટલા લોકો આવશે, ત્યારે મસ્કે જવાબ આપ્યો કે કદાચ તેઓ અને તેમની પાર્ટનર તલુલાહ (Talulah) જ આવશે. આ દરમિયાન મસ્કે ખાસ પૂછ્યું હતું કે, "કયા દિવસે આઇલેન્ડ પર સૌથી વધુ 'વાઇલ્ડ' (Wild) પાર્ટી હશે?". જોકે, બાદમાં કોઈ કારણોસર મસ્ક ત્યાં જઈ શક્યા નહોતા. આ ખુલાસો મસ્કના વર્ષ 2019ના નિવેદનથી બિલકુલ અલગ છે. ત્યારે મસ્કે એપસ્ટિનને 'ક્રીપ' (વિચિત્ર માણસ) ગણાવ્યો હતો અને દાવો કર્યો હતો કે તેમણે આઇલેન્ડ પર જવાના અનેક આમંત્રણો ઠુકરાવી દીધા હતા. પરંતુ આ ઇમેઇલ્સ દર્શાવે છે કે તેઓ પોતે ત્યાં જવા માટે ઉત્સુક હતા.