ગુજરાતમાં અત્યંત ભારે વરસાદની આગાહી કરવામાં આવી છે. તંત્રને એલર્ટ મોડ પર રહેવા જણાવવામાં આવ્યું છે. હવામાન વિભાગે આજે રાજ્યના 10 જિલ્લામાં રેડ એલર્ટ આપ્યું છે એટલે કે અતિથી અતિભારે વરસાદ થવાની સંભાવના વ્યક્ત કરી છે, તો 15 જિલ્લામાં અતિભારે વરસાદની આગાહી કરતા ઓરેન્જ એલર્ટ આપ્યું છે. આ સિવાય 10 જિલ્લામાં યલો એલર્ટ સાથે ભારે વરસાદની આગાહી કરવામાં આવી છે.

હવામાન વિભાગે તેના ટ્વટર હેન્ડલ પર ગુજરાતમાં અત્યંત ભારે વરસાદને લઈ રેડ એલર્ટ જાહેર કર્યું છે. 10 જિલ્લામાં અત્યાંત ભારે વરસાદ થઈ શકે છે. જેમાં કચ્છ, દેવભૂમિ દ્વારકા, જામનગર, પોરબંદર, જુનાગઢ, આ બાજુ દક્ષિણ ગુજરાતમાં સુરત, નવસારી, વલસાડ, દમણ, દાદરા નગર હવેલીમાં અત્યાંત ભારે વરસાદની આગાહી કરી છે.

હવામાન વિભાગ અનુસાર, સૌરાષ્ટ્રમાં મોરબી, રાજકોટ, અમરેલી, ગીર સોમનાથ અને ભાવનગરમાં તો ઉત્તર ગુજરાતમાં પાટણ અને બનાસકાંઠામાં અતિભારે વરસાદ થઈ શકે છે તો મધ્ય ગુજરાતમાં દાહોદ, પંચમહાલ, વડોદરા અને છોટા ઉદેપુરમાં, આ સિવાય દક્ષિણ ગુજરાતમાં ભરૂચ, નર્મદા, તાપી અને ડાંગમાં અતિભારે વરસાદની શક્યતા દર્શાવવામાં આવી છે.