પશ્ચિમ બંગાળમાંથી એક ચોંકાવનારા સમાચાર સામે આવ્યા છે. એક સમયે પશ્ચિમ બંગાળની રાજનીતિમાં મહત્ત્વનું સ્થાન ધરાવતા ઈન્દ્રજીત સિંહા બીરભૂમ જિલ્લાના તારાપીઠ સ્મશાનભૂમિમાં ભીખ માગતા જોવા મળ્યા હતા. 'બુલેટ દા' તરીકે ઓળખાતા આ નેતાની તસવીર વાયરલ થતાં જ ખળભળાટ મચી ગયો હતો. પાર્ટીના જૂના નેતાની હાલત જોઈને પ્રદેશ ભાજપ અધ્યક્ષ અને કેન્દ્રીય શિક્ષણ મંત્રી ડૉ.સુકાંત મજમુદાર એક્શનમાં આવ્યા. તેમણે તરત જ બીરભૂમના બીજેપી જિલ્લા અધ્યક્ષને બીમાર ઈન્દ્રજીત સિન્હાને હોસ્પિટલમાં દાખલ કરવા કહ્યું. રાજ્ય વિધાનસભામાં વિપક્ષના નેતા સુવેન્દુ અધિકારીએ પણ સિંહાની આ હાલતની નોંધ લીધી  ઈન્દ્રજીત સિંહા એક સમયે બંગાળ બીજેપીમાં હેલ્થ સર્વિસ સેલના કન્વીનર હતા. તેમણે ભાજપના કાર્યકરો અને સમર્થકોને તેમના મુશકેલ અને તકલીફના સમયમાં રાજ્યની લગભગ તમામ સરકારી હોસ્પિટલોમાં દાખલ કરાવવાનું કામ કર્યું હતું. તેઓ લગભગ 10 વર્ષ પહેલાં કોંગ્રેસ છોડીને ભાજપમાં જોડાયા હતા અને આરોગ્ય ક્ષેત્રે પક્ષની પકડ મજબૂત કરવા માટે સતત કામ કર્યું હતું. તત્કાલિન પ્રદેશ અધ્યક્ષ રાહુલ સિંહાની સલાહ પર તેઓ રાજકારણમાં સક્રિય થયા અને પોતાની મહેનતથી પાર્ટીમાં પોતાનું નામ બનાવ્યું. તેઓ છેલ્લા બે વર્ષથી કેન્સર સામે ઝઝૂમી રહ્યા હતા. શરૂઆતમાં ગાંઠ મળી આવી હતી, પરંતુ પછી ડોક્ટરોએ તેને અસાધ્ય કેન્સર હોવાની પુષ્ટિ કરી હતી. સારવાર માટે કોઈ નક્કર વ્યવસ્થાના અભાવે તેમને ઘરે-ઘરે ભટકવાની ફરજ પડી હતી. તેમની પાસે રહેવાની કે જમવાની કોઈ વ્યવસ્થા ન હતી. પરિસ્થિતિ એટલી ખરાબ થઈ ગઈ કે તેમણે તારાપીઠ સ્મશાનભૂમિમાં ભીખ માંગીને જીવવું પડ્યું.