સુરત :સુરતના સારોલી વિસ્તારમાં આવેલી પ્રસિદ્ધ શ્યામ સંગિની ટેક્સટાઇલ માર્કેટમાં મધ્યરાત્રિએ અચાનક ભીષણ આગ ફાટી નીકળી હતી. રાત્રે આશરે 12:50 વાગ્યાના સુમારે ફાયર કંટ્રોલ રૂમને આગ અંગેનો મેસેજ મળતાં જ તુરંત જ શરૂઆતમાં 6 ફાયર ફાઇટર વાહનો ઘટનાસ્થળે રવાના કરવામાં આવ્યા હતા. જોકે, આગની ગંભીરતા અને ભયાનકતાને જોતાં તાત્કાલિક 'બ્રિગેડ કોલ' જાહેર કરવામાં આવ્યો હતો. હાલ ઘટનાસ્થળે 15 થી 20 જેટલા ફાયર બ્રિગેડના વાહનો તૈનાત કરીને આગ પર કાબૂ મેળવવાના પ્રયાસ હાથ ધરાયો હતો. 

આગના કારણે સમગ્ર માર્કેટમાં ધુમાડાના ગોટેગોટા છવાઈ જતાં વિઝિબિલિટી નહિવત થઈ ગઈ હતી, જેના કારણે રાત્રિના અંધારામાં ફાયર ફાઇટરોને કામગીરી કરવામાં ભારે મુશ્કેલીનો સામનો કરવો પડ્યો હતો. આ ઉપરાંત, માર્કેટના પેસેજમાં મોટી માત્રામાં માલસામાન પડેલો હોવાથી ફાયર બ્રિગેડના જવાનોને અંદર પહોંચવામાં અડચણ ઊભી થઈ હતી. જોકે, અધિકારીઓના જણાવ્યા અનુસાર પેસેજમાં લાગેલી આગને હાલ નિયંત્રણમાં લઈ લેવામાં આવી છે. ઊંચાઈ પર લાગેલી આગને બુઝાવવા માટે ટર્નટેબલ લેડર અને હાઇડ્રોલિક પ્લેટફોર્મ સિવાય વોટર બાઉઝર, ફાયર એન્જિન અને ટેન્કરની મદદ લેવાઈ રહી છે.