ઉત્તરાખંડના ટિહરીમાં બુદોગી ગામ નજીક ભીષણ દાવાનળ ફાટી નીકળ્યો હતો. સાંજના સમયે લાગેલી આ આગમાં 14 હેક્ટર જંગલ વિસ્તાર બળીને ખાખ થઈ ગયો હતો. ઘટનાની જાણ થતાં જ વન વિભાગ અને ફાયર બ્રિગેડની ટીમો તાત્કાલિક ઘટનાસ્થળે દોડી ગઈ હતી અને આગ પર કાબૂ મેળવવાના પ્રયાસો હાથ ધર્યા હતા.

ટિહરીના ડિવિઝિનલ ફોરેસ્ટ ઓફિસર પુનીત તોમરે જણાવ્યું હતું કે, જંગલમાં લાગેલી આગ ધીમે ધીમે નીચે તરફ જઈ રહી છે, જ્યાં કોઈ વસ્તી નથી. આ આગને કારણે 14 હેક્ટર વિસ્તાર પ્રભાવિત થયો હોવાથી સ્થાનિક લોકોમાં ડરનો માહોલ જોવા મળ્યો હતો, પરંતુ હાલમાં આગ ઓલવવાની કામગીરી ચાલી રહી છે.

બીજી તરફ ઉત્તરાખંડના જ્ઞાનસુ-સાલ્દ રોડ પર બાસુગાંવ નજીક પણ બુધવારે મોડી રાત્રે જંગલમાં આગ લાગી હોવાની માહિતી સામે આવી હતી. આ ભીષણ આગ નજીકના રહેણાંક વિસ્તારોમાં ફેલાવાની આશંકા હતી. જેને પગલે એસડીઆરએફ, વન વિભાગ, એનડીઆરએફ અને ફાયર સર્વિસની ટીમોએ સંયુક્ત ઓપરેશન શરૂ કર્યું હતું.

તમામ એજન્સીઓના સંકલન અને અથાક પ્રયાસોથી જંગલની આગ પર સમયસર કાબૂ મેળવી લેવામાં આવ્યો હતો. ટીમોએ સઘન અભિયાન હાથ ધરીને દાવાનળને રહેણાંક વિસ્તારો સુધી ફેલાતો અટકાવ્યો હતો. એસડીઆરએફના અધિકારીઓના જણાવ્યા અનુસાર, સમયસર કરાયેલી કાર્યવાહીને લીધે એક સંભવિત મોટી દુર્ઘટના ટળી હતી.