દેશની સૌથી મોટી મેડિકલ પ્રવેશ પરીક્ષા નીટ ફરી એકવાર વિવાદોના વંટોળમાં ફસાઈ ગઈ છે. વર્ષ 2026માં યોજાયેલી આ પરીક્ષામાં પેપર લીક અને ગેરરીતિ બાદ આ મામલો દેશની સર્વોચ્ચ અદાલત એટલે કે સુપ્રીમ કોર્ટમાં પહોંચ્યો હતો. સોમવારે આ મામલે સુનાવણી કરતી વખતે સુપ્રીમ કોર્ટે પરીક્ષા લેતી એજન્સી નેશનલ ટેસ્ટિંગ એજન્સી અને કેન્દ્ર સરકાર પર ભારે આક્રોશ ઠાલવ્યો હતો. કોર્ટે ભૂતકાળની ભૂલોમાંથી સબક ન લેવા બદલ સરકારની ઝાટકણી કાઢી હતી અને ટકોર કરી હતી કે આ બહુ દુઃખદ છે કે તમે કંઈ શીખ્યા જ નથી.

આ વર્ષે દેશભરમાંથી અંદાજે 23 લાખ જેટલા વિદ્યાર્થીઓએ નીટ પરીક્ષા આપી છે. વિદ્યાર્થીઓ તરફથી હાજર રહેલા એડવોકેટ તન્વી દુબેએ કોર્ટને આ મામલાની ગંભીરતા અને કટોકટી સમજાવીને વહેલી સુનાવણી કરવા વિનંતી કરી હતી. અરજીઓ સાંભળ્યા બાદ સુપ્રીમ કોર્ટની બેન્ચે ભૂતકાળના સુધારાઓ લાગુ ન થવા બદલ ભારે નારાજગી વ્યક્ત કરતા કહ્યું હતું કે, આ ખરેખર બહુ દુઃખદ છે અને તેઓ પોતાની ભૂલોમાંથી કોઈ પાઠ શીખ્યા જ નથી. કોર્ટે સવાલ કર્યો હતો કે અગાઉ આખી પરીક્ષા પદ્ધતિ સુધારવા માટે એક હાઈ-પાવર્ડ કમિટી બનાવી હોવા છતાં સ્થિતિ કેમ આવી ને આવી જ રહી છે?

સુપ્રીમ કોર્ટે નેશનલ ટેસ્ટિંગ એજન્સી (NTA) અને મોનિટરિંગ કમિટીને કડક આદેશ આપ્યા હતા. કોર્ટે સ્પષ્ટ કર્યું હતું કે આગામી 3 દિવસની અંદર સોગંદનામું દાખલ કરીને વિગતો કોર્ટ સમક્ષ રજૂ કરવામાં આવે. જેમાં 14 નવેમ્બરે રચાયેલી મોનિટરિંગ કમિટીએ અત્યાર સુધી શું કામગીરી કરી તેનો રિપોર્ટ આપવા અને પરીક્ષાની સુરક્ષા મજબૂત કરવા માટે હાઈ-પાવર્ડ કમિટીએ જે ભલામણો કરી હતી, તેને લાગુ કરવા માટે શું પગલાં લેવાયા તેની વિગતવાર માહિતી આપવા જણાવાયું હતું.

સુપ્રીમ કોર્ટે આ કેસની મુખ્ય પિટિશન અને તેની સાથે જોડાયેલી તમામ અરજીઓ પર કેન્દ્ર સરકાર વતી હાજર રહેતા સોલિસિટર જનરલ ઓફ ઇન્ડિયાને નોટિસ પાઠવી હતી. હવે આખોય મામલો 3 દિવસ પછી કોર્ટમાં સોગંદનામું જમા થયા બાદ ફરી ખુલશે. કોર્ટ હવે એ તપાસશે કે અગાઉની નીટ પરીક્ષાઓના કરોડોના કૌભાંડો બાદ સરકારે જે મોટા-મોટા સુધારાના વાયદા કર્યા હતા, તે હકીકતમાં કાગળ પર જ રહી ગયા છે કે તેનો કોઈ અમલ થયો છે.