બુધવારે સવારે ઉત્તર પ્રદેશના ગાઝિયાબાદમાં આવેલી ગૌર ગ્રીન એવન્યુ સોસાયટીમાં ભીષણ આગ લાગી હતી. આ આગ પ્રાથમિક રીતે શોર્ટ સર્કિટના કારણે લાગી હોવાનું મનાય છે, જેણે જોતજોતામાં વિકરાળ સ્વરૂપ ધારણ કર્યું હતું. આગની શરૂઆત 13 માળની ઇમારતના 9મા માળે આવેલા એક ફ્લેટમાંથી થઈ હતી, પરંતુ જોતજોતામાં જ્વાળાઓએ પડોશી ફ્લેટ્સને પણ ઝપેટમાં લઈ લીધા હતા. આ દુર્ઘટનામાં 9મા માળથી લઈને 12મા માળ સુધીના કુલ 8 ફ્લેટ સંપૂર્ણપણે બળીને ખાખ થઈ ગયા હતા. ઘટનાની જાણ થતાં જ ફાયર વિભાગની 20 થી વધુ ગાડીઓ સ્થળ પર પહોંચી ગઈ હતી અને આગ ઓલવવાની કામગીરી શરૂ કરી હતી.

આગ એટલી ભીષણ હતી કે તે એક ટાવરથી બાજુના ટાવર સુધી ફેલાઈ ગઈ હતી અને તેના બે ફ્લેટને પણ નુકસાન પહોંચ્યું હતું. 12મા માળે રહેતા સુનિલે આક્ષેપ કર્યો હતો કે સોસાયટીમાં અગ્નિશામક વ્યવસ્થાનો અભાવ હતો, જેના કારણે નુકસાન વધ્યું છે. દિલ્હીમાં હાજર સુનિલે જ્યારે આગના સમાચાર સાંભળ્યા ત્યારે તેનો પરિવાર માંડ-માંડ જીવ બચાવી બહાર નીકળવામાં સફળ રહ્યો હતો. તેમનો ₹2.5 કરોડનો ફ્લેટ આ આગમાં સંપૂર્ણ નાશ પામ્યો છે. જોકે, રાહતની વાત એ રહી કે સોસાયટીના રહેવાસીઓએ સતર્કતા દાખવી તુરંત ઇમારત ખાલી કરી દીધી હતી, જેના કારણે કોઈ જાનહાનિ થઈ નથી.

વહીવટીતંત્રે આ મામલે તપાસના આદેશ આપ્યા છે અને હાલમાં એમ્બ્યુલન્સ તથા પોલીસ કર્મચારીઓનો કાફલો સ્થળ પર તૈનાત છે. ઉત્તર પ્રદેશના મુખ્યમંત્રી યોગી આદિત્યનાથે પણ આ ઘટનાની ગંભીર નોંધ લીધી છે. તેમણે અધિકારીઓને તાત્કાલિક ઘટનાસ્થળે પહોંચી રાહત અને બચાવ કામગીરી ઝડપી બનાવવાના નિર્દેશ આપ્યા છે. મુખ્યમંત્રીએ પોલીસ કમિશનર અને જિલ્લા મેજિસ્ટ્રેટને સ્થળ પર હાજર રહી પરિસ્થિતિનું સતત નિરીક્ષણ કરવા આદેશ આપ્યો છે. હાલ સાવચેતીના ભાગરૂપે સમગ્ર સોસાયટીને ખાલી કરાવી દેવામાં આવી છે અને આગ પર કાબૂ મેળવવાના પ્રયાસો તેજ કરાયા છે.