ઈરાન-અમેરિકા ડીલને ફાઇનલ થયાને 24 કલાક પણ વીત્યા નથી ત્યાં ઇઝરાયલે લેબનાન પર ફરીથી હુમલો કરી દીધો છે. ઈરાનની ન્યૂઝ એજન્સી IRIBએ લેબનાનના પોતાના સૂત્રોના હવાલાથી દક્ષિણી લેબનાનમાં ઇઝરાયલી હવાઈ અને આર્ટિલરી હુમલાનો અહેવાલ આપ્યો છે. IRIBનો દાવો છે કે ઇઝરાયલે દક્ષિણી લેબનાનના જવતાર, મરકબા અને ખિયામ શહેર પર હુમલો કર્યો છે. એવું જણાવવામાં આવી રહ્યું છે કે ઇઝરાયલે હવાઈ હુમલા અને આર્ટિલરી શેલિંગ બંને કર્યા છે.

આ દરમિયાન દક્ષિણી લેબનાનના અધિકારીઓએ ઇઝરાયલ અને હિઝબુલ્લાહ વચ્ચે ત્રણ મહિનાથી ચાલી રહેલી લડાઈથી બેઘર થયેલા લોકોને ચેતવણી આપી છે કે તેઓ ઉતાવળમાં ઘરે પરત ન ફરે. નોંધનીય છે કે ઈરાન અને અમેરિકાએ સોમવારે આ ડીલ પર પરસ્પર સહમતિ દર્શાવી છે. રાષ્ટ્ર પ્રમુખ ટ્રમ્પે કહ્યું હતું કે શાંતિ કરાર લાગુ થવાની સાથે જ લેબનાન સહિત તમામ મોરચાઓ પર ફાયરિંગ બંધ થઈ જશે. પરંતુ IRIBના દાવા અનુસાર લેબનાન પર ઇઝરાયલે ફરી હુમલો કર્યો છે.

જો કે ઇઝરાયલના આ હુમલાઓમાં કોઈ જાનહાનિ થવાની માહિતી મળી નથી. યુદ્ધવિરામ જાળવી રાખવાના ડિપ્લોમેટિક પ્રયાસો છતાં ઇઝરાયલ-લેબનાન બોર્ડર પર આ હુમલા થયા છે. લોકલ અધિકારીઓ અને લેબનાની મીડિયા પરિસ્થિતિ પર નજીકથી નજર રાખી રહ્યા છે. આ તરફ ઇઝરાયલનું પણ કહેવું છે કે તે દક્ષિણ લેબનાનમાંથી પોતાની સેના નહીં હટાવે અને ન તો કબજો કરેલી જમીનો ખાલી કરશે.

લેબનાનમાં અમેરિકા અને ઈરાન વચ્ચેના સંઘર્ષની સૌથી ઘાતક અસર જોવા મળી છે. ઇઝરાયલના જણાવ્યા અનુસાર, તેમાં હજારો લોકો માર્યા ગયા છે. ઇઝરાયલનો દાવો છે કે તેમાં મોટાભાગના આતંકીઓ હતા. આ તરફ ઈરાન સમર્થિત  જૂથ વિરુદ્ધ ઇઝરાયલના હુમલાને કારણે લગભગ 12 લાખ લોકો બેઘર થઈ ગયા છે. આ જૂથે 2 માર્ચે તેહરાનના સમર્થનમાં ઇઝરાયલ પર ગોળીબાર કર્યો હતો.