એપલના આઇફોન 12 સિરીઝના મોડલ્સ દ્વારા રેડિયેશન એક્સ્પોઝર લિમિટ્સના ભંગનું કારણ ધરીને ફ્રાન્સે આઇફોન 12નું વેચાણ રોકવા આદેશ કર્યો છે. ફ્રાન્સની રેગ્યુલેટરી બૉડીએ કહ્યું છે કે આઇફોન 12 મોડલ્સનો સ્પેસિફિક એબ્ઝોર્બ્શન રેટ (SAR) યુરોપિયન યુનિયન દ્વારા નિર્ધારિત કરાયેલી લીગલ લિમિટથી વધુ છે.

આઇફોન 12 સિરીઝનો SAR રેટ પાંચ મિ.મી.ના અંતરે 5.74 વોટ્સ પર કિલોગ્રામ છે જ્યારે યુરોપિયન યુનિયને 4.0 વોટ્સ પર કિલોગ્રામની લિમિટ નક્કી કરી છે. બેલ્જિયમે પણ આઇફોન 12 સિરીઝ સામે સવાલ ઉઠાવ્યા છે. બેલ્જિયમના ડિજિટલ ઇકોનોમીના જુનિયર મિનિસ્ટર મેથિયુ મિકેલે જણાવ્યું છે કે તેઓ બેલ્જિયમના ટેલિકોમ નિયંત્રકને આઇફોન 12 સિરીઝના સંભવિત હેલ્થ રિસ્ક્સનું વિશ્લેષણ કરવા જણાવશે.

મિકેલે એક ઇન્ટરનેશનલ ન્યૂઝ એજન્સીને ઇ-મેલ મારફત એક નિવેદનમાં કહ્યું કે બેલ્જિયમના તમામ નાગરિકોની સલામતી સુનિશ્ચિત કરવાની મારી ફરજ બને છે. મેં ટેલિકોમ નિયંત્રકને એપલના તમામ સ્માર્ટફોન્સનો રિવ્યૂ કરવા કહ્યું છે.