અમદાવાદઃ ગુજરાત ATS અને રાજસ્થાન પોલીસે સંયુક્ત કાર્યવાહી કરીને HPCLની પાઇપલાઇનમાં પંચર પાડી ક્રૂડ ઓઇલ ચોરતી આંતરરાજ્ય ગેંગનો પર્દાફાશ કર્યો છે. રાજસ્થાનમાંથી ગેરકાયદેસર રીતે ક્રૂડ ઓઇલ ચોરી કરી તેને અમદાવાદ-રાજકોટ હાઇવે પર વેચતા નેટવર્કમાં સંડોવાયેલા કુલ 8 આરોપીઓની ધરપકડ કરવામાં આવી છે.

ગુજરાત ATSના ડીવાયએસપી એસએલ ચૌધરીને મળેલી બાતમીના આધારે અમદાવાદ-રાજકોટ હાઇવે પર સોખડા ગામ નજીકથી એક શંકાસ્પદ વ્યક્તિને અટકાવવામાં આવ્યો હતો. તેની પૂછપરછ દરમિયાન રાજસ્થાનના બાલોત્રાથી ગેરકાયદેસર રીતે ક્રૂડ ઓઇલ લાવી ચોરીનું નેટવર્ક ચલાવવામાં આવતું હોવાની માહિતી પોલીસને મળી હતી. આ માહિતીના આધારે ગુજરાત ATSએ રાજસ્થાન પોલીસ સાથે સંયુક્ત ઓપરેશન હાથ ધર્યું હતું.

સંયુક્ત કાર્યવાહી દરમિયાન રાજસ્થાનના ટાપરા નજીકથી વધુ 7 આરોપીઓને અટકાવવામાં આવ્યા હતા. તપાસમાં કાલુડી ગામની સીમમાં જમીનની અંદર 3-4 ફૂટ ઊંડો ખાડો ખોદીને HPCLની પાઇપલાઇનમાં પંચર પાડવામાં આવ્યું હોવાનું સામે આવ્યું હતું. અહીં પાઇપલાઇન સાથે ગેરકાયદે વાલ્વ ફિટ કરવામાં આવ્યો હતો. પોલીસે HPCLના અધિકારીઓને સાથે રાખીને સ્થળ પર તપાસ અને કાર્યવાહી કરી હતી.

આ મામલે રાજસ્થાનના જાસોલ પોલીસ મથકે ભારતીય ન્યાય સંહિતા તેમજ ‘પ્રિવેન્શન ઓફ ડેમેજ ટુ પબ્લિક પ્રોપર્ટી એક્ટ’ હેઠળ ગુનો નોંધવામાં આવ્યો છે. પોલીસે ક્રૂડ ઓઇલ ચોરીના સમગ્ર નેટવર્ક અંગે વધુ તપાસ શરૂ કરી છે.