અમદાવાદઃ ગુજરાતમાં છેલ્લા કેટલાક દિવસોથી ભારેથી અતિભારે વરસાદી માહોલ છે. તેવામાં હવામાન વિભાગે રાજ્યમાં આગામી 5 દિવસ ગાજવીજ સાથે ધોધમાર વરસાદની આગાહી કરી છે. હવામાન અનુસાર, 1 ઓગસ્ટથી રાજ્યમાં ફરી વરસાદનું જોર વધતું જોવા મળી રહ્યું છે. રાજ્યમાં આગામી 27 જુલાઈએ વાવ થરાદ, પાટણ, વડોદરા, છોટા ઉદેપુર, ભરૂચ, નર્મદા, સુરત, તાપી, નવસારી, ડાંગ, વલસાડ જિલ્લામાં ગાજવીજ સાથે ભારે વરસાદને લઈને યલો એલર્ટ જાહેર કરવામાં આવ્યું છે. ત્યારબાદ 28-29 જુલાઈ દરમિયાન રાજ્યના મોટાભાગના વિસ્તારોમાં મેઘગર્જના સાથે હળવાથી મધ્યમ વરસાદની આગાહી છે.
30 જુલાઈએ દક્ષિણ ગુજરાતના મોટાભાગના જિલ્લામાં વરસાદનું જોર જોવા મળશે. જેમાં છોટા ઉદેપુર, નર્મદા, ભરૂચ, સુરત, તાપી, નવસારી, ડાંગ, વલસાડ જિલ્લામાં ભારે વરસાદનું યલો એલર્ટ જાહેર કર્યું છે.
રાજ્યમાં આગામી 1 ઓગસ્ટથી વરસાદનું ફરી જોર વધતું જોવા મળે છે. જેમાં 24 જિલ્લામાં ધોધમાર વરસાદની આગાહી છે. અમદાવાદ, કચ્છ, મોરબી, સુરેન્દ્રનગર, જામનગર, રાજકોટ, અમરેલી, ભાવનગર, ગાંધીનગર, અરવલ્લી, મહીસાગર, સુરત, તાપી, નવસારી, ડાંગ, વલસાડમાં યલો એલર્ટ છે.
 26 જુલાઈએ સવારે 6 વાગ્યાથી સાંજે 6 વાગ્યા સુધીમાં 92 તાલુકામાં વરસાદ નોંધાયો છે. જેમાં સૌથી વધુ વલસાડના કપરાડામાં 3.23 ઇંચ વરસાદ નોંધાયો છે.