તાજેતરમાં રાજ્યભરમાં ધોધમાર વરસાદ બાદ હાલ વરસાદે થોડો વિરામ લીધો હોય તેવી સ્થિતિ જોવા મળી રહી છે. જોકે અનેક વિસ્તારોમાં હજુ પણ છૂટાછવાયા ઝાપટાં વરસી રહ્યાં છે. હવામાન વિભાગના અનુમાન મુજબ 29 જુલાઈએ રાજ્યના વિવિધ વિસ્તારોમાં હળવાથી મધ્યમ વરસાદની શક્યતા છે, જ્યારે 30 જુલાઈથી 2 ઓગસ્ટ દરમિયાન અનેક જિલ્લાઓમાં ભારેથી અતિભારે વરસાદ વરસી શકે છે. 3 ઓગસ્ટે સમગ્ર રાજ્યમાં ફરી હળવાથી મધ્યમ વરસાદ થવાની સંભાવના છે.

હવામાન વિભાગના જણાવ્યા મુજબ આજે કચ્છ, વાવ-થરાદ, બનાસકાંઠા, પાટણ, મહેસાણા, સાબરકાંઠા, અરવલ્લી, મહીસાગર, અમદાવાદ, ગાંધીનગર, ખેડા, આણંદ, વડોદરા, ભરૂચ, સુરત, તાપી, નવસારી, ડાંગ, વલસાડ, મોરબી, સુરેન્દ્રનગર, બોટાદ, ભાવનગર, અમરેલી, ગીર સોમનાથ, જૂનાગઢ, રાજકોટ, પોરબંદર, દેવભૂમિ દ્વારકા, જામનગર, પંચમહાલ, દાહોદ, છોટા ઉદેપુર અને નર્મદા જિલ્લામાં છૂટાછવાયા સ્થળોએ હળવાથી મધ્યમ વરસાદ પડી શકે છે.

30 અને 31 જુલાઈ દરમિયાન નર્મદા, તાપી, ડાંગ, વડોદરા, છોટા ઉદેપુર, ભરૂચ, સુરત, નવસારી, વલસાડ, દાહોદ, પંચમહાલ, આણંદ, રાજકોટ, સુરેન્દ્રનગર, બોટાદ, અમરેલી, ભાવનગર, અમદાવાદ, ગાંધીનગર, ખેડા, અરવલ્લી અને મહીસાગર જિલ્લામાં ભારેથી અતિભારે વરસાદની આગાહી કરવામાં આવી છે. જ્યારે કચ્છ, મોરબી, જામનગર, દેવભૂમિ દ્વારકા, જૂનાગઢ, ગીર સોમનાથ, પોરબંદર, વાવ-થરાદ, પાટણ, બનાસકાંઠા, મહેસાણા અને સાબરકાંઠા જિલ્લામાં હળવાથી મધ્યમ વરસાદ રહેવાની શક્યતા છે. 1 અને 2 ઓગસ્ટ દરમિયાન પણ રાજ્યના મોટાભાગના જિલ્લાઓમાં મધ્યમથી ભારે વરસાદની શક્યતા છે, જ્યારે 3 ઓગસ્ટે સમગ્ર રાજ્યમાં સાર્વત્રિક હળવાથી મધ્યમ વરસાદ રહેવાનો અંદાજ વ્યક્ત કરવામાં આવ્યો છે.