રાજ્યમાં ચોમાસું જામી જતા સ્ટેટ ઇમરજન્સી ઓપરેશન સેન્ટર (SEOC), ગાંધીનગર દ્વારા જાહેર કરાયેલા આંકડા મુજબ આજે સવારે 6:00થી 10:00 વાગ્યા દરમિયાન માત્ર 4 કલાકમાં રાજ્યના 139 તાલુકાઓમાં વરસાદ નોંધાયો છે. ખાસ કરીને બનાસકાંઠાના સરહદી વાવ-થરાદ વિસ્તાર અને દક્ષિણ ગુજરાતના વાપી-વલસાડ પંથકમાં મેઘરાજાએ ધોધમાર વરસાદ વરસાવ્યો છે.

આ સમયગાળા દરમિયાન દિયોદરમાં સૌથી વધુ 50 મિ.મી. (આશરે 2 ઇંચ) વરસાદ નોંધાયો હતો. ઉપરાંત લાખાણીમાં 47 મિ.મી. (1.85 ઇંચ), રહ તાલુકામાં 45 મિ.મી. (1.77 ઇંચ), ધાનેરામાં 44 મિ.મી., ઓગડમાં 36 મિ.મી., જ્યારે વલસાડ જિલ્લાના નાનાપોંઢામાં 43 મિ.મી. (1.69 ઇંચ) અને કપરાડામાં 34 મિ.મી. વરસાદ નોંધાયો હતો.

અમદાવાદ જિલ્લાના દેત્રોજ-રામપુરામાં સવારે 8:00થી 10:00 દરમિયાન જ 30 મિ.મી. (1.18 ઇંચ) વરસાદ પડતાં અનેક રસ્તાઓ પર પાણી ફરી વળ્યાં હતા. આ ઉપરાંત નવસારીના ખેરગામમાં 26 મિ.મી., ડાંગના સુબિરમાં 25 મિ.મી. અને પાટણના સાંતલપુરમાં 24 મિ.મી. વરસાદ નોંધાયો હતો.

ખેડા, અમદાવાદ ગ્રામ્ય, મહીસાગર, મહેસાણા, ગાંધીનગર, પંચમહાલ, વડોદરા અને નર્મદા સહિતના અન્ય જિલ્લાઓના વિવિધ તાલુકાઓમાં 10થી 23 મિ.મી. સુધી હળવાથી મધ્યમ વરસાદ નોંધાયો છે. આગામી દિવસોમાં પણ રાજ્યમાં વરસાદી માહોલ યથાવત રહેવાની શક્યતા વ્યક્ત કરવામાં આવી છે.