કેન્દ્રીય માહિતી પંચ દ્વારા UPSC સિવિલ સેવા પરીક્ષાના પરિણામોમાં પારદર્શિતા વધારવા માટે એક મહત્વની ભલામણ કરવામાં આવી છે. અત્યાર સુધી પરિણામ જાહેર કરતી વખતે ઉમેદવાર કઈ મુખ્ય શ્રેણી એટલે કે SC, ST અથવા OBC માંથી આવે છે તેની જ વિગતો આપવામાં આવતી હતી. પરંતુ હવે CIC એ એવું સૂચન કર્યું છે કે અંતિમ પસંદગી યાદીમાં ઉમેદવારની મુખ્ય શ્રેણીની સાથે તેની પેટા જ્ઞાતિનો પણ સ્પષ્ટ ઉલ્લેખ કરવો જોઈએ. આ ફેરફાર પાછળનો મુખ્ય હેતુ એ જોવાનો છે કે અનામત નીતિનો ખરેખર લાભ સમાજના એવા વર્ગો સુધી પહોંચે છે કે જેઓ હજુ પણ પછાત છે.

ઘણીવાર એવું જોવા મળે છે કે મુખ્ય શ્રેણીની અંદર અમુક જ જ્ઞાતિઓ અનામતનો વધુ લાભ મેળવતી હોય છે, જ્યારે અન્ય પેટા જ્ઞાતિઓ તેનાથી વંચિત રહી જાય છે. જો પરિણામોમાં આ વિગતો જાહેર કરવામાં આવે, તો અનામતના લાભોનું વિતરણ કેટલું સચોટ અને સમાન છે તેનું ચોકસાઈથી મૂલ્યાંકન કરી શકાશે. આ ભલામણ એક RTI અરજી બાદ લેવામાં આવેલા મહત્ત્વના નિર્ણયના ભાગરૂપે કરવામાં આવી છે. એક વ્યક્તિએ માહિતી અધિકાર હેઠળ વર્ષ 1995ની UPSC પરીક્ષામાં IAS તરીકે પસંદ થયેલા ઉમેદવારોની જ્ઞાતિવાર માહિતી માંગી હતી, જેના જવાબમાં સરકારી વિભાગે જણાવ્યું હતું કે તેમની પાસે માત્ર મુખ્ય શ્રેણીઓનો જ ડેટા ઉપલબ્ધ છે.

આ બાબતને ધ્યાને રાખીને કેન્દ્રીય માહિતી પંચે અવલોકન કર્યું હતું કે જો ભવિષ્યમાં પરિણામોમાં જ્ઞાતિની સાથે પેટા જ્ઞાતિની જાણકારી પણ ઉમેરવામાં આવે, તો તેનાથી વહીવટી પ્રક્રિયામાં ઘણો ફાયદો થશે. તેનાથી એ સ્પષ્ટ રીતે જાણી શકાશે કે અનામતનો લાભ ખરેખર કયા જ્ઞાતિ સમૂહોને મળી રહ્યો છે અને કયા સમૂહો હજુ પણ મુખ્ય પ્રવાહથી દૂર છે. આ પ્રક્રિયાના અમલીકરણથી અનામત નીતિનું વધુ સચોટ અને તાર્કિક મૂલ્યાંકન કરવાનું સરકાર માટે સરળ બનશે.