ગુજરાતની સ્થાનિક સ્વરાજ્યની ચૂંટણીનું પરિણામ જાહેર કરવાની શરૂઆત થઈ ગઈ છે. રાજ્યની 15 મહાનગરપાલિકા, 84 નગરપાલિકા, 34 જિલ્લા પંચાયત અને 260 તાલુકા પંચાયતની કુલ 26,196 બેઠકો પર ચૂંટણી પરિણામો જાહેર થઈ રહ્યા છે. 26 એપ્રિલે આ બેઠકો પર સરેરાશ 57 ટકા મતદાન થયું હતું. અમદાવાદ જિલ્લાની ધોળકા નગરપાલિકાની ચૂંટણીના પરિણામોમાં ભારતીય જનતા પાર્ટીએ એકહથ્થુ શાસન સ્થાપિત કર્યું છે. 36 બેઠકો ધરાવતી આ નગરપાલિકામાં ભાજપે બહુમતીનો જાદુઈ આંકડો પાર કરી લીધો છે. ચૂંટણીની મતગણતરી શરૂ થાય તે પહેલાં જ ભાજપે 11 બેઠકો પર બિનહરીફ વિજય મેળવી લીધો હતો. આજે મતગણતરી દરમિયાન વધુ 10 બેઠકો પર ભાજપના ઉમેદવારો વિજેતા જાહેર થતાં, પક્ષે કુલ 21 બેઠકો સાથે સ્પષ્ટ બહુમતી મેળવી લીધી છે. હજુ પણ બાકીની બેઠકો માટે મતગણતરી ચાલુ છે, પરંતુ ભાજપે બહુમતી હાંસલ કરી લેતા કાર્યકરોમાં ભારે ઉત્સાહ જોવા મળી રહ્યો છે. ધોળકા નગરપાલિકા પર ફરી એકવાર ભાજપનો ભગવો લહેરાયો છે અને વિપક્ષી છાવણીમાં સન્નાટો વ્યાપી ગયો છે.

પંચમહાલના શહેરામાં ભાજપે દબદબો બતાવતા તમામ 11 બેઠકો પર કબજો જમાવી લીધો છે. શહેરા નગરપાલિકાની આ ચૂંટણીમાં કોંગ્રેસના હાથમાં એક પણ બેઠક આવી શકી નહોતી. બીજી તરફ, વડોદરા મ્યુનિસિપલ કોર્પોરેશનની ચૂંટણી બાદ આજે હાથ ધરાયેલી મતગણતરીમાં વોર્ડ નંબર 1માં ઈવીએમ દ્વારા મતગણતરી મોડી શરૂ થતાં ઉમેદવારો અને એજન્ટોએ હોબાળો મચાવ્યો હતો. વોર્ડ નંબર 1, 2 અને 3ની રૂમ નંબર 25માં મતગણતરી હાથ ધરવામાં આવી હતી. અહીં કુલ 78 બેલેટ પેપરની ગણતરી એક કલાક સુધી ચાલતા ઉમેદવારો અને એજન્ટોએ વિરોધ કર્યો હતો. સવારે 10:05 વાગ્યે ઈવીએમ આવ્યા બાદ મતગણતરી શરૂ થઈ હતી.

ચૂંટણી પરિણામોમાં પૂર્વ ધારાસભ્ય ભૂપત ભાયાણીની હાર થઈ છે. 'આપ'માંથી પક્ષપલટો કરીને આવેલા ભૂપત ભાયાણી ભેસાણ બેઠક પર 1500 મતોથી હારી ગયા છે. આ સાથે જ ગુજરાતમાં અખિલેશ યાદવની સમાજવાદી પાર્ટીની એન્ટ્રી થઈ છે. ખેડાની કઠલાલ નગરપાલિકાના વોર્ડ નંબર 4માં સમાજવાદી પાર્ટીના ઉમેદવારે જીત મેળવી છે, જે પક્ષ માટે સારા સમાચાર છે.