બારામતી ઍરપોર્ટ નજીક ૨૮ જાન્યુઆરીએ થયેલા પ્લેન-ક્રૅશમાં અજિત પવાર સહિત ચાર અન્ય લોકોના મોતના મામલે હવે મોટો વળાંક આવ્યો છે. નૅશનલિસ્ટ કૉન્ગ્રેસ પાર્ટી (SP)ના વિધાનસભ્ય રોહિત પવારે આ ઘટનાને સામાન્ય અકસ્માત નહીં પરંતુ સંભવિત હત્યાનું કાવતરું ગણાવી પોલીસમાં ફરિયાદ નોંધાવવાનો સતત પ્રયાસ કર્યો હતો. 

આખરે કર્ણાટકના બૅન્ગલોર સ્થિત શેષાદ્રિપુરમ પોલીસ-સ્ટેશનમાં તેમની ફરિયાદના આધારે ઝીરો FIR નોંધવામાં આવી છે. આ પહેલાં રોહિત પવારે ૨૫ ફેબ્રુઆરીએ મરીન ડ્રાઇવ પોલીસ-સ્ટેશન અને ૨૬ ફેબ્રુઆરીએ બારામતી પોલીસ-સ્ટેશનમાં પણ ફરિયાદ નોંધાવવાનો પ્રયાસ કર્યો હતો, પરંતુ ત્યાં તેમની ફરિયાદ સ્વીકારવામાં આવી નહોતી. 

હાલમાં આ કેસની તપાસ પુણે CID દ્વારા ઍક્સિડેન્ટલ ડેથ રિપોર્ટના આધારે ચાલી રહી છે.  રોહિત પવારે પોતાની ફરિયાદમાં સ્પષ્ટ જણાવ્યું છે કે આ ઘટના માત્ર દુર્ઘટના નથી, પરંતુ નાયબ મુખ્ય પ્રધાનની હત્યા કરવાનું એક મોટું કાવતરું હોઈ શકે છે. તેમની આ ફરિયાદ બાદ હવે કેસ વધુ ગંભીર બની ગયો છે અને તપાસની દિશા બદલાઈ શકે છે.