હવામાન વિભાગ દ્વારા રાજ્યમાં ગરમી અંગે નવી આગાહી કરવામાં આવી છે. પૂર્વાનુમાન અનુસાર, હાલ પશ્ચિમથી ઉત્તર-પશ્ચિમ દિશાના પવનો ફૂંકાઈ રહ્યા છે અને આગામી 22થી 28 એપ્રિલ, 2026 સુધી રાજ્યનું વાતાવરણ સંપૂર્ણપણે શુષ્ક રહેશે. 

હાલમાં પણ રાજ્યમાં આકરો તાપ વર્તાઈ રહ્યો છે, જેમાં અમરેલીમાં સૌથી વધુ 41.1 ડિગ્રી, અમદાવાદમાં 41 ડિગ્રી અને ગાંધીનગરમાં 40.5 ડિગ્રી મહત્તમ તાપમાન નોંધાયું છે. આ ઉપરાંત, દરિયાકાંઠાના વિસ્તારોમાં રહેતા લોકોને આકરી ગરમીની સાથે અસહ્ય બફારાનો પણ સામનો કરવો પડી રહ્યો છે.

આગામી દિવસોમાં ગરમીથી કોઈ રાહત મળવાની શક્યતા નથી, પરંતુ તાપમાનમાં વધુ વધારો જોવા મળશે. હવામાન વિભાગના જણાવ્યા અનુસાર, આગામી 48 કલાક બાદ રાજ્યના મહત્તમ તાપમાનમાં વધુ 2થી 3 ડિગ્રીનો વધારો નોંધાઈ શકે છે. તાપમાન ઊંચકાવવાના કારણે લોકોએ બપોરના સમયે ઘરની બહાર નીકળવામાં મુશ્કેલીનો સામનો કરવો પડી શકે છે અને ગરમીનો પ્રકોપ વધુ તીવ્ર બનશે.

ખાસ કરીને આગામી ચૂંટણીના મતદાનના દિવસે ગરમી પોતાનું રૌદ્ર સ્વરૂપ બતાવશે. આગાહી મુજબ, ૨૬મી તારીખે ચૂંટણીના દિવસે રાજ્યના મોટાભાગના વિસ્તારોમાં ગરમીનો પારો 40થી 43 ડિગ્રીને પાર પહોંચી જવાની પૂરેપૂરી શક્યતા છે. ખાસ કરીને અમદાવાદમાં મતદાનના દિવસે મહત્તમ તાપમાન 42થી 43 ડિગ્રીની આસપાસ રહેશે, જેથી મતદાતાઓએ મતદાન કરવા જતી વખતે ગરમીથી બચવા માટે ખાસ સાવચેતી રાખવી પડશે.