ઈઝરાયલે ગાઝામાં હમાસ અને લેબેનોનમાં હિઝબુલ્લાહ પર ભયાનક રીતે હુમલા કર્યા છે અને હજારો લોકોના જીવ લઈ લીધા છે. ત્યારે હિઝબુલ્લાહ દ્વારા પણ તેને જવાબ આપવાનો પ્રયાસ કરવામાં આવી રહ્યો છે. તાજેતરમાં એક ચોંકાવનારા અહેવાલ સામે આવ્યાં છે. યુદ્ધની આ સ્થિતિ વચ્ચે હિઝબુલ્લાહે ઈઝરાયલ પર ડ્રોન હુમલો કર્યો હતો. આ ડ્રોન હુમલામાં ઈઝરાયલી વડાપ્રધાન બેન્જામિન નેતન્યાહુના મકાનને જ નિશાન બનાવવામાં આવ્યો હોવાનો દાવો કરાયો છે. જો કે હજુ સુધી ઈઝરાયલી સૈન્ય કે સરકાર તરફથી આ મામલે કોઈ પુષ્ટિ કરવામાં આવી નથી. 

ઈઝરાયલમાં હાઈફા કૈસરિયા વિસ્તારમાં આ હુમલો કરવામાં આવ્યો હોવાની માહિતી મળી રહી છે. ઈઝરાયલી સુરક્ષાદળોએ કહ્યું કે આ ડ્રોન એક ખુલ્લા વિસ્તારમાં આવીને પડ્યો હતો જેનાથી કોઈ જાનહાનિ કે નુકસાન થયું નથી. આઇડીએફએ એ વાતની પુષ્ટી કરી હતી કે હિઝબુલ્લાહે આજે ઈઝરાયલ પર રોકેટ અને ડ્રોન વડે ધનાધન હુમલા કર્યા હતા.