ગુજરાત સરકાર દ્વારા ટૂંક સમયમાં નવી ઔદ્યોગિક નીતિ જાહેર કરવામાં આવશે. આ નીતિ અંતર્ગત કેટલીક નવી એસઓપી જાહેર કરાશે અને એક નવી કેટેગરી ઉમેરવામાં આવશે, જેને અલ્ટ્રા મેગા તરીકે ઓળખવામાં આવશે. પોલિસી ડ્રાફ્ટ અનુસાર, થ્રસ્ટ સેક્ટર્સના જે એકમોમાં ઓછામાં ઓછું રૂ. 10,000 કરોડનું રોકાણ હોય અને જે ઓછામાં ઓછા 3000 લોકોને રોજગારી પૂરી પાડતા હોય, તેમનો આ નવી કેટેગરીમાં સમાવેશ કરાશે. સરકાર દ્વારા સૂચિત નીતિમાં થ્રસ્ટ સેક્ટર્સની સંખ્યા વર્તમાન 9 થી વધારીને 16 કરવામાં આવશે. આ ડ્રાફ્ટમાં વધુમાં જણાવાયું છે કે, દર વધારાના રૂ. 5000 કરોડના રોકાણ માટે વધારાના 500 લોકોને રોજગારી આપવી ફરજિયાત રહેશે.

અત્યાર સુધી રાજ્યમાં રૂ. 10,000 કરોડથી વધુનું રોકાણ ધરાવતા ઉદ્યોગોને મેગા ઇન્ડસ્ટ્રીઝ તરીકે ગણવામાં આવતા હતા અને તેમને આત્મનિર્ભર ગુજરાત યોજના હેઠળ ખાસ લાભો અપાતા હતા. સરકારે હવે નવી પોલિસીમાં જ અલ્ટ્રા મેગા ઉદ્યોગોની એક અલગ કેટેગરી બનાવવાનું નક્કી કર્યું છે, જેમાં સૂચિત રોકાણ, રોજગારની ગેરંટી અને પ્રોત્સાહનોની સ્પષ્ટ વ્યાખ્યા નક્કી કરવામાં આવશે. આવા ઉદ્યોગોને મૂડી રોકાણ પર 40% સુધીનું ઇન્સેન્ટિવ મળશે અને તેઓ કેપિટલ સબસિડી, વ્યાજ સબસિડી તેમજ વીજળીના દરમાં રાહત જેવા વિવિધ વિકલ્પો પસંદ કરી શકશે.

થ્રસ્ટ સેક્ટર્સની આ નવી યાદીમાં સેમિકન્ડક્ટર ઈન્ડસ્ટ્રી, ન્યુક્લિયર પાવર ઇક્વિપમેન્ટ, વ્હીકલ સ્ક્રેપિંગ ફેસિલિટી, ઇલેક્ટ્રોનિક વેસ્ટ રિસાયકલિંગ, ટેક્સટાઇલ વેસ્ટ રિસાયકલિંગ, શિપિંગ કન્ટેનર મેન્યુફેક્ચરિંગ, હેવી અર્થ મૂવિંગ ઇક્વિપમેન્ટ, રોબોટ અને ડ્રોન મેન્યુફેક્ચરિંગ જેવા ક્ષેત્રોનો સમાવેશ કરવામાં આવ્યો છે. જ્યારે ગ્રીન એનર્જી, કેપિટલ ઇક્વિપમેન્ટ, કાપડ, એગ્રો-ફૂડ પ્રોસેસિંગ, કેમિકલ્સ અને હેલ્થકેર જેવા ક્ષેત્રોનો અગાઉથી જ આ યાદીમાં સમાવેશ થયેલો છે.