ઈટાલીના વેનિસમાં મંગળવારે મિથેન ગેસ પર ચાલતી બસ એક પુલ પરથી પડી ગઈ હતી. જેના કારણે બસમાં આગ લાગી હતી તેથી બે બાળકો અને વિદેશી પ્રવાસીઓ સહિત 21 લોકોના મોત થયા હતા અને ઘણા લોકો ઘાયલ થયા હતા. મેયર લુઇગી બ્રુગ્નારોએ ફેસબુક પર આ અકસ્માતની જાણકારી આપી હતી.

વેનિસ પ્રદેશના ગવર્નર લુકા ઝૈયાએ જણાવ્યું હતું કે મૃત્યુઆંક ઓછામાં ઓછો 21 હતો અને 20થી વધુ લોકોને હોસ્પિટલમાં દાખલ કરવામાં આવ્યા હતા. તેમણે કહ્યું હતું કે મૃતદેહોને બહાર કાઢવા અને તેમની ઓળખ માટે પ્રયાસો ચાલુ છે. પીડિત અને ઘાયલોમાં માત્ર ઈટાલિયનો જ નહીં પરંતુ ઘણા દેશોના લોકોનો સમાવેશ થાય છે.

સિટી હોલના એક અધિકારીએ જણાવ્યું હતું કે મૃતકોમાં યુક્રેનિયન પ્રવાસીઓનો સમાવેશ થાય છે જ્યારે ઇટાલિયન સમાચાર એજન્સી જણાવ્યું હતું કે મૃતકોમાં જર્મન અને ફ્રેન્ચ નાગરિકો પણ સામેલ છે. શહેરના એક અધિકારીએ જણાવ્યું હતું કે ઘાયલોમાં 3 યુક્રેનિયન, એક ક્રોએશિયન, જર્મન અને ફ્રેન્ચ નાગરિકો છે.

બસ વેનિસના ઐતિહાસિક કેન્દ્રથી કેમ્પિંગ સાઇટ પર પરત ફરી રહી હતી ત્યારે આ અકસ્માત થયો હતો. ફાયર બ્રિગેડે જણાવ્યું હતું કે ઉત્તરી ઇટાલિયન શહેરના મેસ્ત્રે અને માર્ગેરા જિલ્લાઓને જોડતી રેલ્વે લાઇન પરના પુલ પરથી પડી જતાં બસમાં આગ લાગી હતી.