અમરેલી : અમરેલી શહેર અને જિલ્લામાં ભારે ઉકળાટ બાદ વહેલી સવારથી મેઘરાજાનું આગમન થયું છે. અમરેલી જિલ્લાના સાવરકુંડલા તાલુકામાં મોડી રાતથી વરસાદ ખાબકી રહ્યો છે. આજે વહેલી સવારે 6 વાગ્યાથી બપોરે 2 વાગ્યા સુધીમાં અમરેલી જિલ્લાના રાજુલા 66 મી.મી., સાવરકુંડલા 58 મી.મી., ખાંભા 37 મી.મી., લિલિયા 35 મી.મી., જાફરાબાદ  31 મી.મી., બગસરા 20  મી.મી., અમરેલી 17 મી.મી. વરસાદ ખાબક્યો છે. વરસાદને પગલે વાતાવરણમાં ઠંડક પ્રસરતા લોકોને ગરમીમાંથી રાહત મળી છે. 

અમરેલીના ગ્રામ્ય પંથકમાં ઘોઘમાર વરસાદ ખાબક્યો છે ત્યારે નાના માશીયાળા ગામ નજીક એસ.ટી બસ પર વૃક્ષ પડતાં થોડીવાર માટે વાહન વ્યવહાર બંધ થયો હતો. અમરેલીથી ધારી જતાં હાઇવે પર ધોધમાર વરસાદના પગલે રોડ પર વરસાદી પાણી ફરી વળ્યા છે. તો બીજી તરફ દેવરાજીયા માણીલા રોડ પર ખેતરોના પાણી રોડ પર આવતા રોડ પાણી પાણી થયો છે. અમરેલીના ગ્રામ્ય પંથકમાં જળબંબાકાર જેવી સ્થિતિ સર્જાઈ છે. 

અમરેલી જિલ્લા લિલિયામાં ધોધમાર વરસાદના ખાબક્યો છે. ત્યારે લિલિયાના ભોરીગડા ગામે એસ.ટી બસ પાણીમાં ફસાઇ જતાં મુસાફરોના જીવ તાળવે ચોંટ્યા હતા. ભોરીગડા ગામે બની રહેલા કોઝવેના કારણે ડાયવર્ઝન આપવામાં આવ્યો હતો. આ ડાયવર્ઝનમાં પાણી ભરતાં બસ પાણીમાં ફસાઇ ગઇ હતી. જોકે તમામ મુસાફરોનો આબાદ બચાવ થયો છે.