પશ્ચિમ બંગાળ વિધાનસભા ચૂંટણી 2026ના પરિણામો જાહેર થયા બાદ આસનસોલમાં હિંસાની ઘટના સામે આવી છે. અહીં તૃણમૂલ કોંગ્રેસની બે ઓફિસમાં અજાણ્યા શખ્સો દ્વારા તોડફોડ કરવામાં આવી હતી અને ત્યારબાદ તેમાં આગ લગાવી દેવામાં આવી હતી. આસનસોલના સાલાનપુર પોલીસ સ્ટેશન વિસ્તારમાં પણ TMC ઓફિસ પર હુમલો કરીને આગ લગાવાઈ હોવાની માહિતી મળી છે. પરિણામો બાદ ફાટી નીકળેલી આ હિંસાને પગલે સ્થાનિકોમાં ભારે ફફડાટ ફેલાયો હતો.

ઘટનાની જાણ થતાં જ પોલીસનો કાફલો તાત્કાલિક ઘટનાસ્થળે પહોંચી ગયો હતો અને સળગતી ઓફિસો પર કાબૂ મેળવવાની કોશિશ કરી પરિસ્થિતિને નિયંત્રણમાં લીધી હતી. હાલમાં સમગ્ર વિસ્તારમાં શાંતિ જાળવવા માટે પોલીસ દ્વારા ચુસ્ત બંદોબસ્ત ગોઠવી દેવામાં આવ્યો છે. પોલીસ આ હુમલા પાછળ કોનો હાથ છે તે દિશામાં તપાસ કરી રહી છે.

વિસ્તારમાં હજુ પણ તણાવપૂર્ણ સ્થિતિ હોવાથી ઉચ્ચ પોલીસ અધિકારીઓ દ્વારા સતત પેટ્રોલિંગ કરવામાં આવી રહ્યું છે. સ્થાનિક પ્રશાસને લોકોને અફવાઓ પર ધ્યાન ન આપવા અને શાંતિ જાળવી રાખવા અપીલ કરી છે. હિંસાની આ ઘટનામાં થયેલા નુકસાનનો અંદાજ મેળવવાની કાર્યવાહી પણ હાથ ધરવામાં આવી છે.