ફ્રાન્સના પેરિસ સ્થિત એફિલ ટાવર પર શનિવારે હિન્દુ ધાર્મિક સંગઠન BAPSના 100 સભ્યોના પ્રતિનિધિમંડળની ખાનગી મુલાકાત દરમિયાન વિવાદ સર્જાયો હતો. મુલાકાત વખતે મહિલા કર્મચારીઓને તેમના કામના સ્થળેથી હટાવી દેવાયાના ગંભીર આક્ષેપો સાથે સ્ટાફમાં રોષ ફેલાયો હતો. અચાનક વિરોધ પ્રદર્શન શરૂ થતાં ટાવરને અસ્થાયી રૂપે બંધ રાખવાની ફરજ પડી હતી. આ મામલે ફ્રાન્સના નેતાઓ પણ મેદાને આવ્યા છે.

યુનિયનના પ્રતિનિધિ ડિયાન ડેવોઇને ન્યૂઝ એજન્સી રોઇટર્સને જણાવ્યું હતું કે, જ્યારે BAPSના સંતો અને કાર્યકરો ત્યાંથી પસાર થઈ રહ્યા હતા, ત્યારે મહિલાઓને તેમના વર્કસ્ટેશન છોડવા જણાવાયું હતું. મહિલાઓની જગ્યાએ પુરુષ કર્મચારીઓ તેમની જગ્યા લઈ શકે તે માટે આ સૂચના આપવામાં આવી હતી.

આ વર્તનના કારણે સપ્તાહના અંતે કર્મચારીઓ વચ્ચે ભારે તણાવ વધતો ગયો હતો. અસંતોષના પગલે સ્ટાફે સોમવારે સવારે એક બેઠક બોલાવવાનો નિર્ણય લીધો હતો. કર્મચારીઓની આ બેઠકને કારણે જ સોમવારે એફિલ ટાવર સામાન્ય સમય કરતાં મોડો ખોલવામાં આવ્યો હતો.

ટાવરના ગેટ પર સંચાલકો દ્વારા એક બોર્ડ લગાવવામાં આવ્યું હતું, જેમાં ઓપરેશનલ કારણોસર એફિલ ટાવર ખુલવામાં વિલંબ થયો હોવાનું જણાવાયું હતું. ડેવોઇને વધુમાં માહિતી આપી હતી કે, આ સમગ્ર મામલે મેનેજમેન્ટે સ્ટાફની માફી માંગી લીધી છે.