ઓટાવા : કેનેડાએ આંતરરાષ્ટ્રીય વિદ્યાર્થીઓને આપવામાં આવતી સ્ટડી પરમિટની સંખ્યામાં ઘટાડો કર્યો છે. ગયા વર્ષના સમાન સમયગાળાની તુલનામાં 2025ના પ્રથમ ત્રિમાસિક ગાળામાં ભારતીય વિદ્યાર્થીઓને આપવામાં
આવેલી પરમિટમાં 31% ઘટાડો થયો છે.

ઇમિગ્રેશન, રેફ્યુજીસ એન્ડ સિટિઝનશિપ કેનેડા (IRCC)ના ડેટા અનુસાર, જાન્યુઆરી-માર્ચ 2025 વચ્ચે માત્ર 30,640 વિદ્યાર્થીને સ્ટડી પરમિટ આપવામાં આવી હતી, જ્યારે 2024માં સમાન સમયગાળા દરમિયાન આ સંખ્યા
44,295 હતી.

જાન્યુઆરી 2025માં કેનેડાની વસતિ 41.5 મિલિયન હતી, જેમાંથી 32 મિલિયન કામચલાઉ રહેવાસીઓ હતા. આ આશરે 7.25% છે. કેનેડા સરકાર 2028 સુધીમાં આને 5% કરતાં ઓછો કરવા માગે છે.

આ જ કારણ છે કે IRCCએ 2025 માટે સ્ટડી પરમિટ મર્યાદા વધારીને 437,000 કરી છે, જે 2024 કરતાં 10% ઓછી છે. આ મર્યાદા 2026 સુધી અમલમાં રહેશે.

કેનેડાએ 2023થી જ આંતરરાષ્ટ્રીય વિદ્યાર્થીઓની સંખ્યા ઘટાડવાનો પ્રયાસ શરૂ કરી દીધો હતો. કેનેડાએ 2023માં કુલ 6.81 લાખ સ્ટડી પરમિટ જારી કરી હતી, જેમાંથી 2.78 લાખ ભારતીય વિદ્યાર્થીઓ માટે હતા.

2024માં કુલ પરમિટની સંખ્યા ઘટીને 5.16 લાખ થઈ ગઈ, જેમાંથી 1.88 લાખ ભારતીય વિદ્યાર્થીઓ હતા. આના કારણે કેનેડા આવતા આંતરરાષ્ટ્રીય વિદ્યાર્થીઓની સંખ્યામાં લગભગ 40% ઘટાડો થયો છે.

કેનેડા બે જૂથમાં પરમિટ આપશે. એના માટે પ્રાંતીય ચકાસણી પત્ર (PAL) અથવા પ્રાદેશિક ચકાસણી પત્ર (TAL) સબ્મિટ કરવાનો રહેશે. કેનેડા સરકારે સ્ટડી પરમિટ અરજીઓ માટે ઘણા નવા નિયમો રજૂ કર્યા છે, જેનાથી
આંતરરાષ્ટ્રીય વિદ્યાર્થીઓ માટે અરજીપ્રક્રિયા વધુ કડક બની છે.

સંપત્તિનો પુરાવો: 1 જાન્યુઆરી, 2024થી અરજદારોએ સાબિત કરવું પડશે કે તેમની પાસે લગભગ 12.7 લાખ રૂપિયા છે. પહેલાં આ રકમ લગભગ 6.14 લાખ રૂપિયા હતી.
સ્વીકૃતિ પત્રની ચકાસણી: ડિસેમ્બર 2023થી નિયુક્ત શિક્ષણ સંસ્થાઓ (DLI)એ દરેક અરજદારના સ્વીકૃતિ પત્રને IRCC દ્વારા ચકાસવા જરૂરી છે. નકલી અરજીઓને રોકવા માટે આ પગલું લેવામાં આવ્યું છે.
શાળા ટ્રાન્સફર અંગેના નવા નિયમો: 1 મે, 2025થી આંતરરાષ્ટ્રીય વિદ્યાર્થીઓએ શાળા બદલવા માટે નવી અભ્યાસ પરમિટ મેળવવાની જરૂર પડશે. પહેલાં વિદ્યાર્થીઓ ફક્ત IRCCને ઓનલાઈન સૂચના આપીને DLI બદલી
શકતા હતા.

અરજીપ્રક્રિયામાં વિલંબ: IRCC મુજબ, માર્ચ 2025 સુધીમાં સ્ટડી પરમિટ અરજીઓનો બેકલોગ 37% હતો, જે 15%ના લક્ષ્ય કરતાં ઘણો વધારે હતો. આનાથી અરજીપ્રક્રિયામાં વિલંબ થઈ શકે છે અને વિદ્યાર્થીઓને ઓછામાં
ઓછા 30 દિવસ અગાઉ તેમની અરજીઓ સબ્મિટ કરવાની સલાહ આપવામાં આવે છે.

પોસ્ટ-ગ્રેજ્યુએશન વર્ક પરમિટ (PGWP): PGWP માટે લાયક બનવા માટે આંતરરાષ્ટ્રીય વિદ્યાર્થીઓએ DLIમાં નોંધણી કરાવવી જોઈએ અને PGWP-પાત્ર પ્રોગ્રામમાં અભ્યાસ કરવો જોઈએ. આ પરમિટ કેનેડામાં
અભ્યાસ કર્યા પછી કામનો અનુભવ મેળવવા અને કાયમી નિવાસ માટે અરજી કરવામાં મદદ કરે છે.

ઇમિગ્રેશન પ્લાન 2025-2027: કેનેડાએ 2025 માટે 3.95 લાખ કાયમી રહેવાસીઓને સ્વીકારવાનું લક્ષ્ય રાખ્યું છે, જે 2026માં ઘટીને 3.80 લાખ અને 2027માં 3.65 લાખ થઈ ગયું છે. આ કામચલાઉ રહેવાસીઓની સંખ્યા
ઘટાડવાની વ્યાપક વ્યૂહરચનાનો એક ભાગ છે.

વર્ક પરમિટ અને અન્ય નીતિઓ: કેટલાક આંતરરાષ્ટ્રીય વિદ્યાર્થીઓને કેનેડાની અંદરથી વર્ક પરમિટ માટે અરજી કરવાની છૂટ છે, જો તેઓ શરણાર્થી સુરક્ષા માટે અરજી કરવા જેવી ચોક્કસ શરતો પૂરી કરે છે. વધુમાં, સ્ટુડન્ટ
ડાયરેક્ટ સ્ટ્રીમ (SDS) પ્રોગ્રામ તબક્કાવાર બંધ કરવામાં આવશે. અરજદારોએ એ પણ સાબિત કરવું પડશે કે તેઓ તેમની સ્ટડી પરમિટની મુદત પૂરી થયા પછી કેનેડા છોડી દેશે.

આ કડક નિયમોને કારણે કેનેડામાં અભ્યાસ કરવા માગતા ભારતીય વિદ્યાર્થીઓની સંખ્યામાં ઘટાડો થયો છે. IDP એજ્યુકેશન દ્વારા માર્ચ 2025ના સર્વે મુજબ, કેનેડા હવે ભારતીય વિદ્યાર્થીઓની પહેલી પસંદગી નથી. ફક્ત
13% વિદ્યાર્થીઓ કેનેડામાં અભ્યાસ કરવા માગે છે, જ્યારે 2024માં આ આંકડો 19% હતો, જ્યારે ઓસ્ટ્રેલિયા (28%) અને અમેરિકા (22%)માં લોકપ્રિયતા વધી છે.