બોસ્ટનઃ અમેરિકામાં વિદેશી વિદ્યાર્થીઓ, વિનિમય મુલાકાતીઓ અને પત્રકારોના દેશમાં રહેવાનો સમય મર્યાદિત કરવાના ટ્રમ્પ પ્રશાસનના નિયમને બોસ્ટનના સંઘીય ન્યાયાધીશ એફ. ડેનિસ સેલોરે રોકી દીધો છે. સંઘીય ન્યાયાધીશે યુનિયનો અને ઉચ્ચ શિક્ષણ ક્ષેત્રના હિતોની તરફેણમાં ચુકાદો આપ્યો હતો. આ નિર્ણય અમેરિકાના ગૃહ સુરક્ષા વિભાગનો નિયમ અમલમાં આવવાના એક દિવસ પહેલાં આવ્યો હતો.

ન્યાયાધીશ સેલોરે કહ્યું હતું કે વિભાગે નિયમ બદલવા માટે ખૂબ નબળી દલીલો આપી હતી. રાષ્ટ્રીય સુરક્ષા અને વિઝા વ્યવસ્થામાં છેતરપિંડી રોકવાના કારણો દર્શાવવામાં આવ્યા હતા, પરંતુ નિયમ બદલવાથી ઊભી થનારી સમસ્યાઓ પર યોગ્ય ધ્યાન આપવામાં આવ્યું નહોતું અને ઓછા કડક વિકલ્પો પર પણ વિચાર કરાયો નહોતો.

રિપબ્લિકન રાષ્ટ્રપતિ જ્યોર્જ ડબલ્યુ. બુશ દ્વારા નિયુક્ત ન્યાયાધીશે જણાવ્યું હતું કે નવો નિયમ લગભગ 5 દાયકાથી ચાલી રહેલી વ્યવસ્થાને બદલી નાખત. આ વ્યવસ્થા હેઠળ વિદેશી વિદ્યાર્થીઓ પોતાના અભ્યાસક્રમની સમગ્ર મુદત સુધી અમેરિકામાં રહી શકતા હતા અને કામ કરી શકતા હતા. 

તેનાથી કરોડો વિદ્યાર્થીઓ અને સંશોધકોને વિજ્ઞાન, તબીબી તથા ટેક્નોલોજી ક્ષેત્રે યોગદાન આપવાની તક મળી હતી અને અમેરિકાને આર્થિક લાભ થયો હતો.હાલમાં આશરે 16 લાખ લોકો ‘F’ વિઝા અને 5 લાખ લોકો ‘J’ વિઝા ધરાવે છે. ન્યાયાધીશે ચેતવણી આપી હતી કે નવો નિયમ અમલમાં આવ્યો હોત તો મોટી યુનિવર્સિટીઓમાં પ્રવેશ ઘટી શકે અને તેમને કરોડો ડૉલરનું નુકસાન થઈ શકે.