કેલિફોર્નિયા : એઆઈની નવી દોડ ચેટબોટ્સ અને ટેક્સ્ટ જનરેશન સુધી સીમિત નથી. ટેક કંપનીઓ રોબોટ્સને વાસ્તવિક દુનિયામાં કામ કરવા સક્ષમ બનાવવાની દિશામાં આગળ વધી રહી છે. આ સેક્ટરને ફિઝિકલ એઆઈ અથવા એમ્બોડિડ એઆઈ કહેવામાં આવે છે. તેના કેન્દ્રમાં વર્લ્ડ મોડલ્સ છે. જે રોબોટ્સને આસપાસની દુનિયા કેવી રીતે બદલાય છે અને કોઈ ક્રિયા પછી શું પ્રતિક્રિયા હોઈ શકે છે તેનો અંદાજ લગાવવામાં મદદ કરે છે. આ માટે ગૂગલ ડિપમાઈન્ડે જેમિની રોબોટિક્સ ૨ રજૂ કર્યું છે. આ એઆઈ મોડલ હ્યુમનોઈડ સહિત અલગ પ્રકારના રોબોટ્સને ચાલવા, વસ્તુઓ પકડવા, અનેક સ્ટેપ્સવાળા કામનું પ્લાનિંગ કરવા અને અન્ય રોબોટ્સ સાથે મળીને કામ કરવામાં મદદ કરી શકે છે. સામાન્ય રોબોટ્સ પ્રી-પ્રોગ્રામ્ડ હોય છે.

જ્યારે, નવી એઆઈ સિસ્ટમ્સનો હેતુ રોબોટ્સને સમજવામાં મદદ, રીઝનિંગ, મૂવમેન્ટ અને એક્શન લેવામાં મદદ કરવાનો છે. સ્ટેનફોર્ડ યુનિવર્સિટીના જણાવ્યા અનુસાર, ટેકનોલોજી ઝડપથી આગળ વધી હોવા છતાં રોબોટ્સ સામાન્ય માણસ જેવી સમજણ નથી ધરાવતા.તેઓ કંટ્રોલ્ડ સિમ્યુલેશનમાં ૮૯ ટકા સુધી કામ કરી શકે છે. પરંતુ, વાસ્તવિક ઘરેલુ પરિસ્થિતિઓમાં માત્ર ૧૨ ટકા ટાસ્ક જ સફળતાપૂર્વક કરી શકે છે. એટલે, એઆઈની આગામી ચેલેન્જ ચેટબોટ બનાવવાનો નથી. પરંતુ, દુનિયાને સમજવી, તેની આગાહી કરવી અને સુરક્ષિત રીતે પોતાનું કામ પાર પાડવાની છે.