ભારતીય વાયુસેના છે તો આપણે નિશ્ચિત થઇને જીવી શકીએ છીએ. સાથે આપણા સશસ્ત્ર દળ સતત સરહદ પર ઉભા રહીને આપણા સૌનું દીવસ રાત રક્ષણ કરે છે. હવે આવાજ એક સમાચાર આવી રહ્યા છે જેમાં આપણને સૌને ભારતીય વાયુસેના અને સશસ્ત્ર દળો પર ગર્વ થશે.

18 જૂનની રાત્રે એક અત્યંત સંવેદનશીલ અને જીવન બચાવનાર મિશનમાં, ભારતીય વાયુસેના (IAF) એ પુણેની કમાન્ડ હોસ્પિટલથી દિલ્હીની આર્મી હોસ્પિટલમાં ત્રણ મહત્વપૂર્ણ અંગો - એક લીવર અને બે કિડનીને સુરક્ષિત અને ઝડપથી એરલિફ્ટ કર્યા હતા.

બ્રેન ડેડ જાહેર કરાયેલા એક સૈનિકના પરિવાર દ્વારા અંગોનું દાન કરવામાં આવ્યું હતું. આ ઓપરેશન રાતોરાત હાથ ધરવામાં આવ્યું હતું. આ મિશનના ભાગ રૂપે, IAF ટ્રાન્સપોર્ટ એરક્રાફ્ટને પુણેથી દિલ્હી મોકલવામાં આવ્યા હતા અને અંગ પ્રત્યારોપણની સમયમર્યાદા સફળતાપૂર્વક પૂર્ણ કરવામાં આવી હતી. સેનાના આ મિશનથી ઘણા લોકોને નવું જીવન મળ્યું હતું.