કિર્ગિસ્તાનના બિશકેકમાં આયોજિત 26મી શાંઘાઈ કોઓપરેશન ઓર્ગેનાઈઝેશન (SCO) સમિટ વૈશ્વિક રાજકારણની દ્રષ્ટિએ ખૂબ જ ખાસ બની રહી. આ સમિટમાં ભારત, રશિયા અને ચીન એક જ મંચ પર એકસાથે જોવા મળ્યા હતા. આ ત્રણેય દેશોની ભાગીદારી આંતરરાષ્ટ્રીય સ્તરે હંમેશાં મોટા સમીકરણો સર્જે છે અને આ વખતે પણ ત્રણેય નેતાઓની મુલાકાતનો વીડિયો અને તસવીરો સોશિયલ મીડિયા પર વાઇરલ થઈ રહ્યા છે.  સમિટ દરમિયાન જ્યારે રશિયાના પ્રમુખ વ્લાદિમીર પુતિન અને ચીનના પ્રમુખ શી જિનપિંગ એક તરફથી આવી રહ્યા હતા, ત્યારે સામે ભારતના વડાપ્રધાન નરેન્દ્ર મોદી ઊભા હતા. ત્રણેય નેતાઓ સામસામે આવતાં જ ખૂબ જ ઉષ્માભેર એકબીજાને મળ્યા હતા. પીએમ મોદીએ પુતિન અને શી જિનપિંગનો હાથ પકડીને વાતો કરી હતી. આ ક્ષણને વૈશ્વિક મીડિયામાં ભવિષ્યના વૈશ્વિક નેતૃત્વના એક મજબૂત સંદેશ તરીકે જોવામાં આવી રહી છે. છેલ્લા કેટલાક સમયમાં ચીન, ભારત અને રશિયાના શીર્ષ નેતૃત્વ વચ્ચેની આ સતત બીજી મોટી મુલાકાત છે. આગામી સમયમાં ત્રણેય નેતાઓ ફરી એકવાર BRICS સમિટમાં મળવાના છે, જેનું યજમાનપદ આ વખતે ભારત કરી રહ્યું છે. ભારતમાં યોજાનારી આ સમિટમાં રશિયન પ્રમુખ હાજર રહેવાના છે, જ્યારે ચીનના પ્રમુખ પણ હાજરી આપે તેવી શક્યતા છે. શાંઘાઈ કોઓપરેશન ઓર્ગેનાઈઝેશનમાં કુલ 10 સભ્ય દેશો સામેલ છે, જે વિશ્વની કુલ GDPના લગભગ 25% હિસ્સાનું પ્રતિનિધિત્વ કરે છે. આ સંગઠન આંતરરાષ્ટ્રીય નિયમો અને પરસ્પર હિતોના આધારે સભ્ય દેશો વચ્ચે મિત્રતા, ભાઈચારો અને લાંબાગાળાના સહયોગને મજબૂત કરવાનું કામ કરે છે. ભારત, રશિયા અને ચીન ઉપરાંત પાકિસ્તાન, ઈરાન અને કિર્ગિસ્તાન જેવા દેશો પણ આ સંગઠનનો હિસ્સો છે.