અમેરિકા-ઈરાનનું યુદ્ધ ભયાનક તબક્કે પહોંચી ગયું છે. બંને દેશો એકબીજા પર ભારે હુમલાઓ કરી રહ્યા છે. તાજેતરમાં અમેરિકાએ ઈરાનની રાજધાની તહેરાનમાં અનેક ઠેકાણાઓ પર હુમલાઓ કર્યા હતા. ત્યારે ઈરાને વળતો જવાબ આપીને જોર્ડનમાં તહેનાત અમેરિકન ફાઈટર જેટ પર મિસાઈલો અને ડ્રોનથી હુમલો કરીને તોડી પાડ્યા હોવાનો દાવો કર્યો છે. આ હુમલામાં ઓછામાં ઓછા 8 લોકોના મોત થયા છે.

ઈરાની સેનાએ દાવો કર્યો છે કે, તેણે અમેરિકાના ફાઈટર જેટ્સમાં ફ્યૂલ ભરનારા અનેક વિમાનો અને ફાઈટર જેટ્સને ધ્વસ્ત કરી દીધા છે. આ હુમલામાં અનેક લોકોને ગંભીર નુકસાન પહોંચ્યું હોવાનો પણ દાવો કર્યો છે. ઈરાને જોર્ડનની પ્રજાને વિનંતી કરી છે કે, તેઓ તેમના દેશમાં ઈસ્લામ વિરોધી અમેરિકન હિતોનો વિરોધ કરે. ઈરાની મીડિયા રિપોર્ટ મુજબ, ઈરાની સેનાએ કહ્યું કે, તેઓએ ઈરાનમાં ઈરાની સૈનિકોની હત્યાનો બદલો લેવા માટે સીરિયાના અલ-તનફમાં એક અમેરિકન કમાન્ડ સેન્ટર પર પણ હુમલો કર્યો હતો. જોકે આ દાવા પર હજુ સુધી પુષ્ટી થઈ નથી. આ મામલે સીરિયાઈ સરકાર અને અમેરિકન સેના તરફથી પણ કોઈ ટિપ્પણી કરવામાં આવી નથી.

અમેરિકાએ ઈરાન પર હુમલાઓ વધારી ત્યાં પુલો અને વીજળી પ્રોજેક્ટોને નિશાન બનાવ્યા છે. આ ઉપરાંત ઈરાનના સૌથી મહત્ત્વના પોર્ટ પર ધડાધડ મિસાઈલ હુમલો કરીને એક ટાવરને પણ ધ્વસ્ત કરી દીધો છે. આ હુમલો અમેરિકન રાષ્ટ્રપ્રમુખ ડોનાલ્ડ ટ્રમ્પની ધમકી બાદ કરવામાં આવ્યો છે. ટ્રમ્પે ઈરાન પર દબાણ વધારવા માટે તેના ઈન્ફ્રાસ્ટ્રક્ચર પર હુમલો કરવાની વાત કહી હતી. ઈરાને હોર્મુઝ જળમાર્ગ પર નાકાબંધી કરી રાખી છે, જેને અટકાવવા માટે અમેરિકા ઈરાન પર હુમલાઓ કરી રહ્યું છે.