ભારત અને અમેરિકા વચ્ચેના વ્યૂહાત્મક અને વ્યાપારિક સંબંધો ટૂંક સમયમાં એક નવા સુવર્ણ યુગમાં પ્રવેશવા જઈ રહ્યા છે. અમેરિકાના વિદેશ મંત્રી માર્કો રુબિયોએ (Marco Rubio) એક બહુ મોટું એલાન કરતાં જણાવ્યું છે કે અમેરિકી રાષ્ટ્રપ્રમુખ ડોનાલ્ડ ટ્રમ્પ (Donald Trump) આગામી વર્ષની શરૂઆતમાં ભારતની મુલાકાતે આવશે. આ ઐતિહાસિક વીવીઆઈપી (VVIP) પ્રવાસને લઈને બંને દેશોના રાજદ્વારી વર્તુળોમાં ભારે ઉત્સાહનો માહોલ જોવા મળી રહ્યો છે.

અમેરિકી વિદેશ મંત્રી માર્કો રુબિયોએ સ્પષ્ટ કર્યું છે કે તેઓ પોતે રાષ્ટ્રપ્રમુખ ટ્રમ્પના આ ભારત પ્રવાસની તૈયારીઓને આખરી ઓપ આપવા માટે ટૂંક સમયમાં જ ભારત આવી રહ્યા છે. આ મુલાકાતનો મુખ્ય હેતુ બંને દેશો વચ્ચે લાંબા સમયથી પ્રસ્તાવિત અને બહુપ્રતીક્ષિત ટ્રેડ ડીલને વહેલી તકે ફાઇનલ કરવાનો છે. બંને દેશો વચ્ચે વેપાર અને આયાત-નિકાસના નિયમોને વધુ મજબૂત બનાવવા માટે આ મુલાકાત અત્યંત મહત્વપૂર્ણ સાબિત થશે.

વિશ્વની સૌથી મોટી અને પાંચમી સૌથી મોટી અર્થવ્યવસ્થા વચ્ચેના સંબંધોને આ પ્રવાસથી નવી ઊંચાઈ મળશે. તાજેતરમાં જ બંને દેશો વચ્ચે ટેરિફ બેનિફિટ્સ અને વ્યાપારિક શરતોને લઈને ઉચ્ચ સ્તરીય ચર્ચાઓ ચાલી રહી છે, ત્યારે અમેરિકી વિદેશ મંત્રીના આ એલાન અને રાષ્ટ્રપ્રમુખ ટ્રમ્પની સંભવિત ભારત મુલાકાતથી અબજો ડોલરના વ્યાપારિક કરારો પર મહોર વાગવાની પૂરેપૂરી શક્યતા છે.