અમદાવાદઃ રાજકીય પક્ષોને ચૂંટણી ખર્ચ માટે ઇલેક્ટોરલ ટ્રસ્ટ થકી દાન આપવાની વ્યવસ્થા હેઠળ વર્ષ 2024-25 ના આંકડા જાહેર થયા છે. આ વિશ્લેષણ મુજબ, સમગ્ર દેશમાં રાજકીય પક્ષોને દાન આપવામાં ગુજરાત, દિલ્હી અને મહારાષ્ટ્ર પછી ત્રીજા ક્રમે રહ્યું છે.  એસોસિએશન ફોર ડેમોક્રેટિક રિફોર્મ્સ (ADR) દ્વારા નાણાકીય વર્ષ 2024-25 માટે ₹20,000 થી વધુના રાજકીય દાનના કરવામાં આવેલા વિશ્લેષણમાં જાણવા મળ્યું છે કે, દિલ્હી અને મહારાષ્ટ્ર પછી ₹309.2 કરોડ સાથે ગુજરાત દેશમાં ત્રીજું સૌથી મોટું દાતા રાજ્ય રહ્યું છે.

કુલ દાનમાંથી ₹308.4 કરોડ ભાજપને, ₹69 લાખ કોંગ્રેસને અને ₹10 લાખ AAP ને મળ્યા હતા. અહેવાલ મુજબ, કુલ દાનમાં ₹250.4 કરોડ અથવા 81% કોર્પોરેટ દાતાઓ તરફથી અને ₹57.5 કરોડ અથવા 19% વ્યક્તિગત દાતાઓ તરફથી મળ્યા હતા. અન્યનો ફાળો નજીવો રહ્યો હતો.

રિપોર્ટ મુજબ, આઠ કોર્પોરેટ સંસ્થાઓ અને વ્યક્તિઓ દ્વારા આપવામાં આવેલા 12 દાનનો હિસ્સો ₹130 કરોડ એટલે કે કુલ દાનના 42% જેટલો થાય છે. કુલ દાનમાં ₹45 કરોડ સાથે સફલ ગોયલ રિયલ્ટી LLP મોખરે હતું, ત્યારબાદ સૌરાષ્ટ્ર સિમેન્ટ લિમિટેડ અને નિર્મા લિમિટેડ દ્વારા ₹10-10 કરોડ, અને હાર્દિક અગ્રવાલ તથા દિનેશચંદ્ર અગ્રવાલ દ્વારા ₹10-10 કરોડના બે દાન આપવામાં આવ્યા હતા. નડિયાદ સ્થિત 'શ્રી કેદાર એગ્રો ન્યુટ્રીટેક LLP' એ ₹5 કરોડના ત્રણ દાન આપ્યા હતા, જ્યારે એગ્રોસેલ ઇન્ડસ્ટ્રીઝ પ્રાઇવેટ લિમિટેડ અને હિમગિરી કોર્પોરેશન દ્વારા પણ ₹5 કરોડનું દાન આપવામાં આવ્યું હતું.