આણંદ અને નડિયાદ વચ્ચે અમદાવાદ-વડોદરા એક્સપ્રેસ હાઈવે પર વહેલી સવારે એક ગોઝારો અકસ્માત સર્જાયો હતો. સુરતથી રાજસ્થાન જઈ રહેલી સાઈ દર્શન ટ્રાવેલ્સની લક્ઝરી બસ ઓવરટેકિંગ લેનમાં એક ટ્રક સાથે ધડાકાભેર અથડાતાં 7 મુસાફરોના ઘટનાસ્થળે જ કમકમાટીભર્યા મોત નીપજ્યા હતા. આ ભયાનક દુર્ઘટનામાં અન્ય 5 લોકો ગંભીર રીતે ઘાયલ થયા છે. અકસ્માતની જાણ થતાં જ પોલીસ અને સ્થાનિક લોકો તાત્કાલિક બચાવ કામગીરી માટે ઘટનાસ્થળે દોડી ગયા હતા.

દુર્ઘટના બની ત્યારે વહેલી સવારનો સમય હોવાથી બસમાં સવાર મોટાભાગના મુસાફરો ગાઢ નિંદ્રામાં હતા. અચાનક થયેલી ભીષણ ટક્કરથી લોકો ઊંઘમાંથી જાગી ગયા હતા અને ચારેતરફ ચીસાચીસ તેમજ અફરાતફરી મચી ગઈ હતી. આ અકસ્માતમાં ઈજાગ્રસ્ત થયેલા સુરતના રહેવાસી ધનેશ જાદવે જણાવ્યું હતું કે, તેઓ બસમાં બેઠા હતા ત્યારે અચાનક થયેલા મોટા ધડાકા બાદ બસમાં ભારે બૂમાબૂમ થઈ ગઈ હતી.

એક મૃતકના પરિવારજને જણાવ્યું હતું કે, તેમને રાત્રે સવા ત્રણ વાગ્યાની આસપાસ ફોન પર અકસ્માત અને તેમાં તેમના બનેવીના અવસાનની જાણ થતાં તેઓ તાત્કાલિક સુરતથી આવી પહોંચ્યા હતા. ઘટનાસ્થળે પહોંચેલી પોલીસે સ્થાનિકોની મદદથી ફસાયેલા મુસાફરોને બહાર કાઢ્યા હતા. તમામ 7 મૃતદેહોનું પંચનામું કરી પોસ્ટમોર્ટમ માટે મોકલી દેવાયા છે, જ્યારે 5 ઈજાગ્રસ્તોને નજીકની હોસ્પિટલમાં સારવાર અર્થે દાખલ કરવામાં આવ્યા છે.

આ ગંભીર દુર્ઘટનાને પગલે એક્સપ્રેસ હાઈવે પર થોડા સમય માટે વાહનવ્યવહાર ખોરવાયો હતો. જોકે, પોલીસે ક્ષતિગ્રસ્ત વાહનોને રસ્તા પરથી દૂર કરીને ટ્રાફિક ફરીથી પૂર્વવત કરાવ્યો હતો. હાલમાં પોલીસે આ સમગ્ર ઘટના અંગે વિધિવત ગુનો દાખલ કરીને આગળની કાયદેસરની તપાસ હાથ ધરી છે.