ભારત અને ઝિમ્બાબ્વે વચ્ચે રમાયેલી બીજી T20 મેચમાં ભારતે શાનદાર પ્રદર્શન કરીને ઝિમ્બાબ્વેને 90 રને પરાજય આપ્યો છે. ઝિમ્બાબ્વેએ ટોસ જીતીને પહેલા બોલિંગ કરવાનો નિર્ણય લીધો હતો. ભારતે પહેલા બેટિંગ કરતા 5 વિકેટે 219 રન બનાવીને 220 રનનો વિશાળ ટાર્ગેટ આપ્યો હતો. જવાબમાં ઝિમ્બાબ્વેની આખી ટીમ માત્ર 129 રનમાં ઓલઆઉટ થઈ ગઈ હતી. ભારતીય બેટિંગમાં ઈશાન કિશને સૌથી વધુ 44 બોલમાં 9 ફોર અને 2 સિક્સ સાથે 81 રન ફટકાર્યા હતા. તિલક વર્માએ વિસ્ફોટક રમતા 29 બોલમાં 5 ફોર અને 3 સિક્સ સાથે અણનમ 60 રન (તેમના T20 કરિયરની 9મી અડધી સદી) બનાવ્યા હતા. બંને વચ્ચે 43 બોલમાં 94 રનની મહત્વપૂર્ણ ભાગીદારી થઈ હતી.
220 રનના લક્ષ્યાંકનો પીછો કરવા ઉતરેલી ઝિમ્બાબ્વેની ટીમને ભારતીય બોલરોએ શરૂઆતથી જ દબાણમાં રાખી હતી. બોલર યશ ઠાકુરે બ્રાયન બેનેટને 32 રને આઉટ કરીને પોતાની આંતરરાષ્ટ્રીય કરિયરની પ્રથમ વિકેટ ઝડપી હતી. અભિષેકે બેટિંગમાં ભલે ઓછા રન બનાવ્યા હોય, પરંતુ તેણે બોલિંગમાં દમદાર પ્રદર્શન કર્યું હતું, તેણે માત્ર 2.5 ઓવરમાં 17 રન આપી ત્રણ વિકેટ ઝડપી હતી.
પ્રિન્સ યાદવે પણ શ્રેષ્ઠ બોલિંગ કરતા બેન કરન (1 રન) અને ઝિમ્બાબ્વેના કેપ્ટન સિકંદર રઝાને શૂન્ય (0) રને આઉટ કરીને ઝિમ્બાબ્વેને મોટો ઝટકો આપ્યો હતો.
સ્પિનર રવિ બિશ્નોઈએ ડિયોન મેયર્સ (12 રન)ને ક્લીન બોલ્ડ કર્યો હતો. પાવરપ્લેમાં જ ટોપ ઓર્ડર ધરાશાયી થતાં ઝિમ્બાબ્વેની અડધી ટીમ 65 રનમાં પેવેલિયન ભેગી થઈ ગઈ હતી અને અંતે સમગ્ર ટીમ 129 રને સમેટાઈ ગઈ હતી.