અમેરિકાના કેલિફોર્નિયામાં આવેલી બ્યૂટ કાઉન્ટી લાઈબ્રેરીમાં નરસંહાર કરવાની સનકમાં 18 વર્ષના એક યુવકે અંધાધૂંધ ગોળીબાર કર્યો હતો. સોમવારે સાંજે 5 વાગ્યાની આસપાસ બનેલી આ ઘટનામાં બે લોકોના મોત નીપજ્યા છે, જ્યારે એક બાળકી ઘાયલ થઈ છે. ચીકો પોલીસ વિભાગે ત્વરિત કાર્યવાહી કરીને હુમલાખોર યુવક જ્યારે લાઈબ્રેરીના પાછળના દરવાજેથી ભાગવાનો પ્રયાસ કરી રહ્યો હતો, ત્યારે જ તેની ધરપકડ કરી લીધી હતી.

પોલીસ તપાસમાં હુમલાખોરની ઓળખ 18 વર્ષના બ્રેડલી સ્કોટ સાયર તરીકે થઈ છે અને તેની સામે હત્યાના બે ગુના નોંધીને તેને જેલમાં ધકેલી દેવામાં આવ્યો છે. પોલીસના જણાવ્યા અનુસાર આ હુમલાખોર અમેરિકાના કુખ્યાત કોલંબાઇન સ્કૂલ નરસંહાર જેવી સામૂહિક હત્યા કરવા માંગતો હતો અને તેણે કોલંબાઇનના હત્યારા એરિક હેરિસ જેવા જ કપડાં પહેર્યા હતા. પ્રાથમિક તપાસમાં બહાર આવ્યું છે કે તે ઈન્ટરનેટ પર સામૂહિક હત્યારાઓને પસંદ કરતા જૂથ સાથે જોડાયેલો હતો અને આ સનકમાં જ તેણે એકલા હાથે કોઈપણ ઓળખાણ વગરના નિર્દોષ લોકો પર હુમલો કરી દીધો હતો.

ગોળીબારની આ ઘટનામાં હુમલાખોરે લાઈબ્રેરીમાં આશરે 8 રાઉન્ડ ફાયરિંગ કર્યું હતું. તેણે એક વ્યક્તિને લાઈબ્રેરીના મુખ્ય દરવાજા પર અને બીજા વ્યક્તિને ઈમારતના પાછળના ભાગમાં ગોળી મારી હતી. આ હુમલામાં 74 વર્ષના રોબર્ટ જોહ્ન્સનનું ઘટનાસ્થળે જ મોત નીપજ્યું હતું. જ્યારે 46 વર્ષના કોડી હલને ગંભીર હાલતમાં હોસ્પિટલ લઈ જવામાં આવ્યા હતા, જ્યાં ફરજ પરના તબીબોએ તેમને મૃત જાહેર કર્યા હતા. કોડી હલ પોતાના મિત્રની દીકરીને લાઈબ્રેરી ફેરવવા લઈ ગયા હતા, ત્યારે કાચના ટુકડા વાગવાના કારણે આ નાની બાળકી પણ ઘાયલ થઈ હતી. જોકે પ્રાથમિક સારવાર બાદ બાળકીને હોસ્પિટલમાંથી રજા આપી દેવામાં આવી છે.