અમેરિકા અને ઈરાન વચ્ચેનો લશ્કરી સંઘર્ષ વધુ તીવ્ર બન્યો હોવાના દાવાઓ સામે આવ્યા છે. ઈરાની મીડિયા અને ઈસ્લામિક રિવોલ્યુશનરી ગાર્ડ કોર્પ્સ (IRGC)ના જણાવ્યા અનુસાર, ઈરાને અમેરિકાનું આશરે 3.4 કરોડ ડોલરનું MQ-9 રીપર ડ્રોન તોડી પાડ્યું છે તેમજ જોર્ડન અને કુવૈતમાં આવેલા અમેરિકી સૈન્ય મથકો પર મિસાઈલ હુમલા કર્યા છે. બીજી તરફ અમેરિકાએ પણ વળતો પ્રહાર કરતાં ઈરાનના અનેક વિસ્તારોમાં એરસ્ટ્રાઈક શરૂ કરી હોવાનું અહેવાલોમાં જણાવાયું છે. આ દાવાઓની સ્વતંત્ર પુષ્ટિ થઈ નથી.

ઈરાની મીડિયા મુજબ, બુશેહર ઉપર ઉડી રહેલા અમેરિકી MQ-9 રીપર ડ્રોનને ઈરાની સેનાએ નિશાન બનાવ્યું હતું. સાથે જ IRGCએ જાહેરાત કરી છે કે હોર્મુઝ સ્ટ્રેટ હવે સંપૂર્ણપણે બંધ કરવામાં આવ્યો છે. તેના જણાવ્યા અનુસાર, ચેતવણી છતાં આગળ વધેલા બે ઓઈલ ટેન્કરો માઇનફિલ્ડમાં પ્રવેશતા જ જોરદાર વિસ્ફોટો સાથે આગની ઝપેટમાં આવી ગયા હતા. હોર્મુઝ સ્ટ્રેટને અસુરક્ષિત જાહેર કરાયા બાદ વૈશ્વિક તેલ બજારમાં ગભરાટનો માહોલ સર્જાયો હોવાનું જણાવવામાં આવ્યું છે.

ઈરાની મીડિયાના દાવા મુજબ, જોર્ડન સ્થિત મુવફ્ફક સાલ્ટી એર બેઝ પર ઈરાનની મિસાઈલો ત્રાટકી હતી, જ્યાં મોટી સંખ્યામાં અમેરિકી સૈનિકો તહેનાત છે. ઉપરાંત કુવૈતમાં આવેલા અમેરિકી સૈન્ય કેમ્પો પર પણ હુમલા કરાયા હોવાનું જણાવાયું છે. બીજી તરફ ઈરાની ન્યૂઝ એજન્સીઓના અહેવાલ મુજબ, અમેરિકાએ ઈરાનના યઝદ, ખુઝેસ્તાન પ્રાંતના અહવાઝ અને ફાર્સ પ્રાંતના લાસ વિસ્તારની બહારના વિસ્તારોમાં ભારે બોમ્બમારો કર્યો છે. યઝદમાં પાંચ શક્તિશાળી વિસ્ફોટો થયા હોવાનું અને અહવાઝ પર મિસાઈલ હુમલાની સ્થાનિક અધિકારીઓએ પુષ્ટિ કરી હોવાનું પણ દાવો કરવામાં આવ્યો છે.