બાંગુઈમાં મધ્ય આફ્રિકન રિપબ્લિકના પશ્ચિમ ભાગમાં આવેલી એક સોનાની ખાણ અચાનક ધસી પડતા મોટી હોનારત સર્જાઈ છે. આ દુર્ઘટનામાં આશરે 30થી વધુ ખાણિયાઓના મોત નીપજ્યા છે, જ્યારે અનેક લોકો હજુ પણ અંદર ફસાયેલા હોવાનું સામે આવ્યું છે. ઘટનાની જાણ થતાં જ તંત્ર દ્વારા રાહત અને બચાવ કામગીરી શરૂ કરી દેવામાં આવી છે અને ખાણમાં ફસાયેલા લોકોને બહાર કાઢવાના પ્રયાસો ચાલી રહ્યા છે.

બચી ગયેલા એક વ્યક્તિએ આપેલી વિગત મુજબ આ દુર્ઘટના નાના મામબેરે પ્રીફેક્ટરના અબ્બા વિસ્તારમાં બની છે. આ એક પરંપરાગત ખાણ હતી, જેમાં ટેકનોલોજીનો મર્યાદિત ઉપયોગ થતો હતો. બચાવ કર્મચારીઓ અંદર ફસાયેલા લોકોની શોધખોળ કરી રહ્યા છે, પરંતુ તેમના જીવિત રહેવાની શક્યતા ખૂબ જ ઓછી હોવાનું જણાવાઈ રહ્યું છે.

આ વિસ્તારના ડેપ્યુટી મેયર સુલેમાન બીએ જણાવ્યું કે સુરક્ષા કર્મચારીઓ અને સ્થાનિકોની મદદથી અત્યાર સુધીમાં 30 લોકોના મૃતદેહો બહાર કાઢવામાં આવ્યા છે. ઈજાગ્રસ્ત મજૂરોને સારવાર માટે નજીકની હોસ્પિટલમાં ખસેડવામાં આવ્યા છે. 

ડેપ્યુટી મેયરે વધુમાં કહ્યું કે આ ઘટના ખૂબ જ ભયાનક છે, તેથી અમે સ્વયંસેવી સંગઠનો અને સ્થાનિક લોકોને મદદ માટે આગળ આવવાની અપીલ કરી રહ્યા છીએ, જેથી અંદર ફસાયેલા લોકોને બહાર કાઢી શકાય. તેમની આ અપીલને ધ્યાને લઈને અનેક લોકો મદદ માટે આગળ આવી રહ્યા હોવાનું સૂત્રો પાસેથી જાણવા મળ્યું છે.