યુક્રેને સોમવાર રાતથી મંગળવાર સવાર સુધીમાં મોસ્કો તરફ 600થી વધુ ડ્રોન છોડ્યા હતા. મોસ્કોના મેયર સર્ગેઈ સોબ્યાનિનના જણાવ્યા અનુસાર આ હુમલો યુદ્ધ દરમિયાન કિવ દ્વારા કરવામાં આવેલા સૌથી મોટા લાંબા અંતરના હુમલાઓમાંનો એક હતો અને તેમાં વાઈલ્ડબેરીઝની સુવિધાને પણ નુકસાન પહોંચ્યું છે. વિશ્લેષણ કરાયેલા આંકડા પણ આ હુમલો અત્યંત મોટો હોવાનું દર્શાવે છે.

મેયર સર્ગેઈ સોબ્યાનિને જણાવ્યું હતું કે યુક્રેને રશિયાની રાજધાની મોસ્કો તરફ ઓછામાં ઓછા 637 ડ્રોન મોકલ્યા હતા. તેમાંથી ઓછામાં ઓછા 197 ડ્રોનને મોસ્કો ક્ષેત્રમાં રશિયન હવાઈ સંરક્ષણ તંત્રએ તોડી પાડ્યા હતા. રશિયાના સંરક્ષણ મંત્રાલયના જણાવ્યા અનુસાર રાતોરાત કુલ 791 યુક્રેનિયન ડ્રોન તોડી પાડવામાં આવ્યા હતા.

ડ્રોન હુમલાઓ દરમિયાન ઓછામાં ઓછા ત્રણ લોકો ઘાયલ થયા હતા. મોસ્કો ક્ષેત્રના ગવર્નર આન્દ્રે વોરોબ્યોવે જણાવ્યું હતું કે ઘાયલોમાં 10 વર્ષની બાળકીનો પણ સમાવેશ થાય છે. બે લોકો શહેરના દક્ષિણ પૂર્વીય ઉપનગરોમાં ઘાયલ થયા હતા, જ્યારે એક વ્યક્તિ શહેરના કેન્દ્રથી ઉત્તર પૂર્વ વિસ્તારમાં ઘાયલ થયો હતો.

મોસ્કોની પૂર્વ દિશામાં આવેલા ત્રણ જિલ્લાઓમાં રહેણાંક મિલકતોને નુકસાન થયું હતું. આ ઉપરાંત રાજધાનીના દક્ષિણ પૂર્વમાં આવેલા કોલોમ્ના શહેરમાં એક શોપિંગ સેન્ટર, સ્થાનિક સરકારી ઈમારત અને રહેણાંક ઈમારતને પણ નુકસાન પહોંચ્યું હતું.