અમેરિકી શાંતિદૂતોની મુલાકાત બાદ રશિયાએ મંગળવારે વહેલી સવારે યુક્રેનની રાજધાની કિવ પર ડ્રોન અને મિસાઈલથી હુમલો કર્યો હતો. થોડા સમયના વિરામ બાદ ફરી શરૂ થયેલા આ હવાઈ હુમલામાં 2 લોકોનાં મોત થયા હતા અને 10 લોકો ઘાયલ થયા હતા. હુમલા દરમિયાન શહેરના વિવિધ વિસ્તારોમાં આગ લાગી હતી, જેના કારણે સ્થાનિકોમાં ભય ફેલાયો હતો.

કિવના મેયર વિટાલી ક્લિટશ્કોએ જણાવ્યું હતું કે એક જિલ્લામાં કાટમાળ પડતાં 5 માળની એપાર્ટમેન્ટ ઈમારત અને 3 માળના રહેણાંક બ્લોકમાં આગ લાગી હતી. અધિકારીઓના જણાવ્યા અનુસાર હુમલામાં ઓછામાં ઓછી 14 ઊંચી ઈમારતો ઉપરાંત એક છાત્રાલય, શાળા, ક્લિનિક, વેરહાઉસ અને અન્ય સ્થળોને નુકસાન થયું હતું.

હુમલાની સૌથી વધુ અસર રહેણાંક વિસ્તારોમાં થઈ હતી. અમેરિકી શાંતિદૂત જેરેડ કુશનર અને સ્ટીવ વિટકોફ રવિવારે યુક્રેનના રાષ્ટ્રપતિ વોલોદિમીર ઝેલેન્સ્કી સાથે બેઠક કર્યા બાદ કિવથી રવાના થયા હતા. તેમની મુલાકાત માટે થોડા સમયની રાહત બાદ રશિયાએ ફરી હવાઈ હુમલા શરૂ કર્યા હતા.

ટ્રમ્પ વહીવટીતંત્રે યુક્રેનમાં ચાલી રહેલા રશિયાના 4.5 વર્ષના યુદ્ધનો અંત લાવવા માટે દબાણ વધાર્યું છે. કુશનર અને વિટકોફ મોસ્કોમાં થયેલી વાટાઘાટો બાદ યુક્રેન પહોંચ્યા હતા. ત્યારબાદ ક્રેમલિને ત્રિપક્ષીય વાટાઘાટો ફરી શરૂ કરવાની શક્યતાને નકારી ન હોવાનું જણાવ્યું હતું.