દક્ષિણ કોરિયાએ કૃત્રિમ બુદ્ધિમત્તા અને સેમિકન્ડક્ટર ક્ષેત્રમાં પોતાનું પ્રભુત્વ વધારવા અત્યાર સુધીની સૌથી મોટી આર્થિક યોજનાની જાહેરાત કરી છે. રાષ્ટ્રપતિ લી જે મ્યુંગના જણાવ્યા અનુસાર, આ પ્રોગ્રામ હેઠળ દેશમાં આશરે 49 લાખ કરોડ રૂપિયા એટલે કે 576 અબજ ડોલરનું રોકાણ કરવામાં આવશે. આ મહત્વકાંક્ષી પ્રોજેક્ટમાં અગ્રણી કંપનીઓ સેમસંગ ઇલેક્ટ્રોનિક્સ અને એસકે હાયનિક્સ સૌથી મુખ્ય ભૂમિકા ભજવવા જઈ રહી છે.

આ યોજના અંતર્ગત સેમસંગ અને એસકે હાયનિક્સ તેમના સહયોગીઓ સાથે મળીને દક્ષિણ-પશ્ચિમ વિસ્તારમાં ચાર આધુનિક સેમિકન્ડક્ટર નિર્માણ એકમો શરૂ કરશે. આ માટે અંદાજે 518 અબજ ડોલર એટલે કે 800 ટ્રિલિયન વોનનું મૂડીરોકાણ કરાશે. આ ઉપરાંત ચુંગચિઓંગ પ્રાંતમાં અત્યાધુનિક ચિપ પેકેજિંગ ક્લસ્ટર વિકસાવવા માટે 81 ટ્રિલિયન વોન વધારાના ફાળવવામાં આવશે. રાષ્ટ્રપતિએ સ્પષ્ટ કર્યું હતું કે વૈશ્વિક સ્પર્ધામાં અગ્રેસર રહેવા માટે સેમિકન્ડક્ટર, ફિઝિકલ એઆઈ અને ડેટા સેન્ટર દેશના વિકાસનો મુખ્ય પાયો બનશે.

સરકારે વર્ષ 2030 સુધીમાં દેશમાં મેમરી ચિપનું ઉત્પાદન બમણું કરવાનું ચોક્કસ લક્ષ્ય રાખ્યું છે. સર્વર માટે અત્યંત જરૂરી એવી હાઈ-બેન્ડવિડ્થ મેમરી ચિપના સંશોધન અને ઉત્પાદનને વિશેષ પ્રાથમિકતા અપાશે. આ યોજનાના ત્રીજા ભાગરૂપે સમગ્ર દેશમાં વિશાળ એઆઈ ડેટા સેન્ટર નેટવર્ક ઊભું કરવામાં આવશે. જેના માટે સરકાર અને ખાનગી ક્ષેત્ર સંયુક્ત રીતે વર્ષ 2035 સુધીમાં 1000 ટ્રિલિયન વોનથી વધુનું રોકાણ કરીને ઉચ્ચ ક્ષમતાવાળા ડેટા સેન્ટરો વિકસાવશે.

આટલા મોટા પાયે થનારા આર્થિક રોકાણ અને માળખાગત વિકાસની સાથે અન્ય એક લક્ષ્યાંક પણ નક્કી કરવામાં આવ્યો છે. સરકારે જાહેર કરેલા નવા રોડમેપ મુજબ, દક્ષિણ કોરિયાને વર્ષ 2030 સુધીમાં ફિઝિકલ એઆઈ અને રોબોટિક્સ ક્ષેત્રે પણ વિશ્વસ્તરે અગ્રણી નેતા તરીકે પ્રસ્થાપિત કરવાના સઘન પ્રયાસો હાથ ધરવામાં આવશે.