ફ્લાયદુબઈ કોકપિટ ઘટના પર ઇઝરાયેલના વડાપ્રધાન બેન્જામિન નેતન્યાહૂએ એક્શન ઓર્ડર આપતા કહ્યું છે કે જે લોકો પણ આ ઘટના પાછળ છે, તેમણે તેની ભારે કિંમત ચૂકવવી પડશે. તપાસકર્તાઓનું માનવું છે કે ફ્લાયદુબઈ કોકપિટ ઘટનાના હુમલાખોરમાં ઈસ્લામિક કટ્ટરપંથની ભાવના આવી ગઈ હતી. તેનો ઈરાદો મુસાફરો સહિત વિમાનને ક્રેશ કરવાનો હતો.
જેમ-જેમ સમય વીતી રહ્યો છે, તેમ-તેમ ચિત્ર સ્પષ્ટ થતું જઈ રહ્યું છે. યાનીવ અને તેના બહાદુર મિત્રોએ 11 સપ્ટેમ્બર જેવી મોટી તબાહીને રોકી છે. હુમલાખોર ઈસ્લામિક કટ્ટરપંથથી પ્રભાવિત હતો. તે મુસાફરો સાથે વિમાનને ક્રેશ કરવા આવ્યો હતો. અમે હવે એ વાતની તપાસ કરી રહ્યા છીએ કે શું તેને મોકલવામાં આવ્યો હતો. જેણે પણ તેને મોકલ્યો છે, તેણે ભારે કિંમત ચૂકવવી પડશે.
આ પહેલાં યુએઈના પ્રેસિડેન્ટ એડવાઈઝર અન્વર ગર્ગશે બુધવારે થયેલી આ દુર્ઘટનાના પ્રયાસને આતંકવાદી કૃત્ય ગણાવ્યું હતું. આ પહેલીવાર હતું જ્યારે આ ઘટનાને લઈને કોઈ પણ પ્રકારે આતંકવાદી જોડાણ હોવાનો દાવો કરવામાં આવ્યો હતો. આ સિવાય કેપ્ટન સ્મિત મછારની પ્રશંસા કરતા ગર્ગશે કહ્યું કે પાયલટે એક સંભવિત મોટી દુર્ઘટના રોકીને સાહસ અને જવાબદારીનો સાચો અર્થ બતાવ્યો છે. આ સિવાય તેમણે અટકળો અને કાવતરાની થીયરીઓથી બચવાની પણ સલાહ આપી હતી.

બીજી તરફ ઇઝરાયેલના સંરક્ષણ મંત્રી કાત્ઝે આ ઘટનાને જિહાદી હુમલાનો પ્રયાસ ગણાવ્યો હતો. વળી, બેન્જામિન નેતન્યાહૂએ આ ઘટનાના તુરંત બાદ કહ્યું હતું કે તપાસકર્તાઓ એ વાતની પણ તપાસ કરી રહ્યા છે કે શું આ હુમલામાં ઈરાનનો કોઈ હાથ હતો. પરંતુ તેમણે એ પણ કહ્યું હતું કે અત્યારે કોઈ પણ તારણ પર પહોંચવું ખૂબ જ ઉતાવળિયું ગણાશે.