આજે શેરબજાર ઘટ્યું:સેન્સેક્સ 371 પોઈન્ટ ઘટીને 61,560 પર બંધ, 30માંથી 23 શેરો ગબડ્યા

May 17, 2023

મુંબઈ   : આજે એટલે કે બુધવારે (17 મે) શેરબજારમાં ઘટાડો જોવા મળ્યો છે. સેન્સેક્સ 371 પોઈન્ટના ઘટાડા સાથે 61,560 પર બંધ રહ્યો હતો. ગઈ કાલે પણ એ જ રીતે બજાર બંધ થયું હતું. નિફ્ટી 104 પોઈન્ટ ઘટીને 18,181 પર બંધ રહ્યો હતો. સેન્સેક્સના 30 શેરોમાંથી 23 ઘટ્યા અને માત્ર 7માં જ વધારો થયો. યુએસ ડોલર સામે રૂપિયો 13 પૈસા નબળો પડીને 82.28ના સ્તર પર બંધ થયો હતો.

બજાર બંધ થાય ત્યાં સુધી ઓટો અને એફએમસીજી નજીવા વધારા સાથે બંધ થયા. મીડિયા 2.09% અને રિયલ્ટી 1.33% સૌથી વધુ તૂટ્યા. IT 0.97% તૂટ્યું છે. એનર્જી, બેન્કિંગ અને ફાર્મા શેરોમાં પણ ઘટાડો નોંધાયો હતો.

ડૉલર ઇન્ડેક્સમાં રિબાઉન્ડથી કોમોડિટીઝ પર દબાણ જોવા મળી રહ્યું છે. કાચા તેલમાં 0.5% થી વધુ ઘટાડો થયો છે. બ્રેન્ટ ક્રૂડ હાલમાં પ્રતિ બેરલ 75 ડોલરની આસપાસ ટ્રેડ કરી રહ્યું છે. જ્યારે WTI પ્રતિ બેરલ $71 ની આસપાસ ટ્રેડ કરી રહ્યું છે.

ટેલિકોમ કંપની ભારતી એરટેલે મંગળવારે તેના Q4FY23 એટલે કે ચોથા ક્વાર્ટર (જાન્યુઆરી-માર્ચ)ના પરિણામો જાહેર કર્યા. માર્ચ ક્વાર્ટરમાં કંપનીનો કોન્સોલિડેટેડ ચોખ્ખો નફો 50% વધીને રૂ. 3,006 કરોડ થયો છે. ગયા વર્ષના સમાન ક્વાર્ટરમાં કંપનીએ રૂ. 2,008 કરોડનો નફો નોંધાવ્યો હતો. માર્ચ ક્વાર્ટરમાં ઓપરેશન્સમાંથી એરટેલની આવક રૂ. 36,009 કરોડ હતી, જે એક વર્ષ અગાઉના ક્વાર્ટરમાં રૂ. 31,500 કરોડની સરખામણીમાં 14% વધુ છે.

આ પહેલા મંગળવારે એટલે કે 16 મેના રોજ શેરબજારમાં ઘટાડો જોવા મળ્યો હતો. સેન્સેક્સ 413 પોઈન્ટ ઘટીને 61,932 પર બંધ રહ્યો હતો. નિફ્ટી પણ 125 પોઈન્ટ ઘટીને 18,273 પર બંધ રહ્યો હતો. સેન્સેક્સના 30 શેરોમાંથી 13 વધ્યા અને 17માં ઘટાડો થયો.