ભારતીય ક્રિકેટ કંટ્રોલ બોર્ડ (BCCI) એ IPL દરમિયાન ખેલાડીઓની સુરક્ષા અને પારદર્શિતા વધારવા માટે અત્યંત કડક માર્ગદર્શિકા જાહેર કરી છે. BCCIના વાઇસ પ્રેસિડેન્ટ રાજીવ શુક્લાએ સ્પષ્ટ કર્યું છે કે, ટૂર્નામેન્ટ દરમિયાન ખેલાડીઓ સુધી પહોંચવા પર નિયંત્રણ રાખવામાં આવશે. જેથી કોઈપણ પ્રકારની ગેરરીતિ કે સુરક્ષા જોખમને ટાળી શકાય. હવે ચાહકો કે બિનઅધિકૃત વ્યક્તિઓ ટીમ હોટલ, ટીમ બસ કે ખેલાડીઓના અંગત વિસ્તારોમાં તેમને મળી શકશે નહીં. કોઈપણ ખેલાડી કે અધિકારીના રૂમમાં ટીમ મેનેજરની મંજૂરી વગર કોઈ જઈ શકશે નહીં, પછી ભલે તે મિત્ર કે સંબંધી કેમ ન હોય. BCCIએ તમામ 10 ફ્રેન્ચાઈઝીને 7 પાનાની ગાઈડલાઈન મોકલી છે, જેમાં ખેલાડીઓને હની-ટ્રેપ જેવા સંભવિત જોખમોથી સાવધ રહેવા જણાવાયું છે. ફ્રેન્ચાઈઝીઓ નિયમોનું પાલન કરે છે કે નહીં તે જોવા માટે બોર્ડ ગમે ત્યારે અચાનક તપાસ પણ કરશે. તાજેતરમાં રાજસ્થાન રોયલ્સના કેપ્ટન રિયાન પરાગનો ડ્રેસિંગ રૂમમાં વેપિંગ કરતો વીડિયો સામે આવ્યો જ્યારે યુઝી ચહલ પણ ફ્લાઇટમાં વેપિંગ કરતો હોય તેવો વીડિયો વાયરલ થયા બાદ બોર્ડે કડક વલણ અપનાવ્યું છે. બોર્ડે ચેતવણી આપી છે કે ભારતમાં ઈ-સિગારેટ પ્રતિબંધિત છે અને જો કોઈ ખેલાડી આવું કરતા ઝડપાશે તો તેની સામે કાયદેસરની કાર્યવાહી થઈ શકે છે. મેચ દરમિયાન ફ્રેન્ચાઈઝી માલિકો ડગઆઉટમાં ખેલાડીઓ, કોચ કે સપોર્ટ સ્ટાફ સાથે વાતચીત કરી શકશે નહીં. બોર્ડનું માનવું છે કે, આનાથી રમત દરમિયાન બિનજરૂરી દબાણ અને બહારની દખલગીરી ઓછી થશે. આ નવા નિયમોનો ઉદ્દેશ્ય IPLને વધુ સુરક્ષિત અને પ્રોફેશનલ બનાવવાનો છે જેથી ટૂર્નામેન્ટની વિશ્વસનીયતા જળવાઈ રહે.