વિશ્વના કેટલાક દેશોમાં કુદરતી આફતનો સિલસિલો યથાવત છે. ફિલિપાઈન્સમાં 7.8ની તીવ્રતાના એક શક્તિશાળી ભૂકંપના આંચકા બાદ હવે દરિયાકાંઠાના વિસ્તારો પર સુનામીનો મોટો ખતરો તોળાઈ રહ્યો છે. અમેરિકન સુનામી ચેતવણી પ્રણાલી (US Tsunami Warning System) એ સુનામીની સત્તાવાર ચેતવણી જાહેર કરતા જણાવ્યું છે કે, ખતરનાક દરિયાઈ મોજા આ ક્ષેત્રના દરિયાકાંઠાને ગંભીર રીતે પ્રભાવિત કરી શકે છે. આ આંતરરાષ્ટ્રીય ચેતવણી બાદ ઇન્ડોનેશિયાની જીઓફિઝિક્સ એજન્સીએ પણ દેશના ઉત્તર-પૂર્વીય તટીય વિસ્તારો માટે સુનામીનું એલર્ટ જારી કર્યું છે અને સ્થાનિક રહીશોને અત્યંત સતર્ક રહેવા તેમજ સત્તાવાર સૂચનાઓનું પાલન કરવા તાકીદ કરી છે.

હવામાન અને ભૂગર્ભીય એજન્સીઓના જણાવ્યા અનુસાર, પ્રભાવિત દરિયાકાંઠાના વિસ્તારોમાં એક મીટર કરતાં પણ વધુ ઊંચી સુનામીની લહેરો ત્રાટકી શકે છે. આ ગંભીર પરિસ્થિતિને ધ્યાનમાં રાખીને વહીવટી તંત્ર દ્વારા દક્ષિણ ફિલિપાઇન્સના અનેક પ્રાંતોના રહેવાસીઓને કોઈ પણ પ્રકારની વિલંબ કર્યા વિના તાત્કાલિક ઊંચા અને સુરક્ષિત સ્થળો પર સ્થળાંતર કરી જવા માટે આદેશ આપવામાં આવ્યા છે. આપત્તિ વ્યવસ્થાપન એજન્સીઓ સતત સમુદ્રના સ્તરની સ્થિતિ પર નજર રાખી રહી છે અને ભૂકંપની તીવ્રતાના પ્રભાવનું મૂલ્યાંકન કરી રહી છે.

નિષ્ણાતોએ ચેતવણી આપી છે કે આ શક્તિશાળી ભૂકંપના કારણે મોટા પાયે નુકસાન થવાની સંભાવના છે. આ સાથે જ આગામી કલાકો અને દિવસોમાં પણ પૃથ્વીની અંદર થતી હલચલને કારણે તીવ્ર આફ્ટરશોક્સ (ભૂકંપ પછીના આંચકા) આવી શકે છે, જેનાથી લોકોમાં ભયનો માહોલ છે.

અત્રે ઉલ્લેખનીય છે કે, આ પહેલા રવિવારે ભારત સહિત વિશ્વના અનેક દેશોમાં ભૂકંપના જોરદાર આંચકા અનુભવાયા હતા. રિક્ટર સ્કેલ પર 5.3 ની તીવ્રતા ધરાવતા આ ભૂકંપનું કેન્દ્રબિંદુ પાડોશી દેશ ભૂટાન હતું. ભૂટાન ઉપરાંત ભારત, નેપાળ અને ચીનના કેટલાક ભાગોમાં પણ ધરતી ધ્રુજી ઉઠી હતી.

ભારતમાં આ ભૂકંપની વ્યાપક અસર અસમ અને પશ્ચિમ બંગાળના કેટલાક વિસ્તારોમાં જોવા મળી હતી, જેના કારણે લોકો ઘરની બહાર દોડી આવ્યા હતા.